Hans Fallada girji Alle dør alene

Mun lean aiddo geargan girjjiin Alle dør alene, ja mun in sáhte čiehkat ahte lean duđavaš. Ii lean olles áiggi nu somá dan lohkat, lei gal veaháš lossat duollet dállet, ja várra bođii oidnosii ahte lea čállon 1940-logus. Dalle ii lean gal seamma hoahppu.

Hans Fallada girjjis...

- dál dárbbašan lakcajieŋa fas -

... oahpásnuvvat ovttain párrain mii Hitlerduiskkas čállá poastakoarttaide oanehis dieđuid: "Eadni! Führer lea goddán mu bártni. Eadni! Führer áigu du bártniid maid goddit, son ii bisán ovdal go váivi lea boahtán buot viesuide dán máilmmis." Ja de juohkiba daid koarttaid tráhppaviesuide, vai olbmot de gávdnet daid ja lohket daid...

- ii šaddan gal lakcajiekŋa, muhto baicce guollesákkit vuohon, nu go juohke beaivvi -

Gal dat dohkkii, dát girji. Miellagiddevaš oahpásnuvvat lagabui olbmuide mat sohtet ja ráhčet juogaman ovddas.

- dál go lean borran albma borramuša, de lea várra lohpi fas álgit dainna lakcajieŋain -

Lei gal garra eallin soahteáiggis. Ii lean leaika.

Sámi máilbmi ja Jazz máilbmi

Fertešin doapmalit bargui, muhto velledan baicce sofás. Okta jurdda lei mus ikte dehe ovddit beaivvi. Jazzservodat ja jazzlávlagat "rumašin dahket" stuoragávpotsivilisašuvnna. Sámi servodat ii leat seamma go stuoragávpotsivilisašuvdna. Sámi jazz šaddá ge danin hui ártegis seaguhus guovtti kultuvrras. Munnje leaba Sámi máilbmi ja Jazz máilbmi guokte geaži ovtta sákkis. Nu mun jurddašin. Lei somás jurdda. Muhto ii lean várra dađi eanet.

Nina Simone lávlu I'm gonna leave you.

Gohcit ijaid

Mun dál bártidan oađđimin, dehe bártidan ja bártidan. Gal dat lea seamma, in mun dárbbaš nohkkat visses áigái. Ja danin lea gal várra dohkálaš ahte lea ná. Vaikko lea gal veaháš kontraproduktiiva ja nu ain. Nu lea várra jurdda maid... Mun gozán ijaid, ja de nohkan 8-9-áiggi iđđediid, ja de oađán gitta 17 rádjái. Na na, gal dat oažžu nu leat. Ii dat gal leat nu váralaš, ii jur dán vahkus goit, go mus lea luopmu.

Ledje ikte muhtun guossit, lei hui buorre. Guovttis báziiga guhká, manaiga ruoktot muhtun diimmuid dassái. Lei hui somá, mii humaimet ollu. Eat šaddan gal gálašit, vaikko veaháš humaimet dan birra.

Vare mun dál fidnešin nahkáriid. In šat gille gohcit ja jurddašit. Sáhtán vel veaháš lohkat girjjis maid dál logan: Alle dør allene.

Identitehta - viehkkin?

Govven Sara Victoria Andersen.

Makkár olmmoš hálidan leahkit? Mun lean maŋemus jagi eanet ja eanet gilvvohallan "gorutlaččat", lean viehkan ja čuoigan. Ovdelaš áiggiid gal lean maid viehkan, iežan vuoimmi doallan dihte badjin, muhto in leat gal gilvvuide searvan nu dávja. Lean gal Värmlanddas muhtumin viehkan miilla ovttas áhčiin ja oappáin. Muhto dál lean váldán ođđa lávkki, go lean marathona viehkan. Vihken diibmá beallemarathona, ja dat ii lean nu stuorra ášši, muhto go dán jagi lean čuoigan Sámi Ski Race (čuigen 6 miilla) ja viehkan olles Midnight Sun Marathona, de rahpasit ođđa vejolašvuođat. Mun sáhtán álgit identifieret iežan "friskalášmmohallin". Mun sáhtán bidjat govaid nehttii. Mun sáhtán čállit mu trimmenáiggiid birra. Mun sáhtán joatkit ja dieđihit iežan gilvvuide: viehkamiidda ja čuoigamiidda... Muhto mun sáhtán maiddái dál lávket maŋos ja lohkat ahte dál lean čájehan dan maid áigon čájehit, namalassii ahte lea vejolaš viehkat ja čuoigat guhkás, jus beare hálida. Ja de sáhtán joatkit trimmet dušše doallan dihte iežan foarpmas. Mun in dalle dárbbašivčče buot daid gilvvuid.

Mus leat olbmát mat vihket ja sihkkelastet ja čuiget. Muhtun jágiid eanet ja muhtun jagiid fas unnit. Mun in leat gal jearran mot dat váikkuhit sin eallimiidda, go nu ollu hárjehallet álo.

Lil Kim - Black Friday (Nicki Minaj Diss) Official Video

Marathon lei dejli

Åh, dat lea dejli, mus ii leat hoahppu. Jus dál in fidne nahkáriid, de fidnen veaháš maŋŋelaš. Dehe diimmu geahčen. Mus ii leat ihttin bargu, mu luopmu lea álgán. In dárbbaš ge lihkkat áiggil masage.

Åh lei dejli viehkat, ja dejli maŋŋil, go ollejin mollii ja measta in nagodan čuožžut. Åh lei dejli oaidnit olbmuid moddjámin ja addimin mu vihta aliha, go ledjen ollen, go ledjen ceavzán teastta. Åh lei dejli.

Åh lei dál dejli fitnat olgun vázzimin, geahččalan dihte oažžut dehkiid johtui fas. Åh lei dejli vanáhallat daid go ollejin ruoktot. Åh lea dejli bidjat iežas govaid Facebookii.

Åh lea dejli dáid beivviid eallit.

Plánat marathonii

Ja odne mii leat Tromsii, dál 35 minuhta geahčen mis lea vuolgga. Šaddá miellagiddevaš. Ferten doallat iežan plánaid, in ge galgga dál vuollánit ja álgit jurddašit diimmu vuostá viehkat. Vaikko lea ge veaháš miella. Diet mihtideapmi. Lea ártet. Muhto mun hálidan geahččalit doallat iežan plána, ja dat lei viehkat hui njoazit. Mun jáhkán ahte mun ferten dan doallat. Muđui mun riskeren visot massit.

Movttas vuolgit johtui

Luststyrd. Lusten. Att starta i lusten. Mokta, movttas. Diktit dan leahkit vuolgga, vuolginsadji. Lusta. Mokta. Ii ge preassa. Ii ge deaddu. Ii ge mihkkege eará. Juo, dieppe leat dieđusge eará ingredienssat maiddái. Muhto lusta gal lea dat mii stivre. Mun in gille álo leat barggus. Mun in leat dan mađi gávppašeaddji dehe fitnodeaddji. Mun hálidan dávja leat drivejuvvon movttas. Movttas galgá leat geađgi, kärnan. Danne čálán ge dán bloggačállosa. Odne. Go ipmirdan buorebut ja buorebut mii lea dán blokka vuolggasadji. Lust. Ja nu dat galgá. Dat lea dehálaš. Mun oaivvildan dan. Duođas.

1800

Dát lea mu 1800:át čálus dán blokkas. Gal dat lea somá čállit :)
In mun dáidde dál vuos heaitit čállimis. Lean gal muhtumin jurddašan livččii go vejolaš ráhkadit girjji dáin čállosiin, dehe dáid čállosiid vuođul, muhto mun eahpidan dan. Girjji oažžut čoahkkái gal lea váttis. Ferte hui buorre jurdda leat, ja de ferte dainna hui bures bargat.

Mun lean geassefestii, nu go eskke namuhin. In dieđe vuos galggan go ráhkket dan ovdal, vai sáhtán go boahtit skávžaolmmájin? Láiki lean dieđusge šaddamin. Hálidivččen oanehaš botta oađđit ovdal manan. Ja de hálidivččen diŋgot drosje, in ge ieš sihkkelastit.

1799

Lean ožžon dipssa dál vuioŋŋastit nu ollu go vejolaš lávvordaga rádjái. Vai nagodan bures viehkat 4 miilla Midnight Sun Marathonas, dehe rievtti mielde 4,2 miilla (42 195 mehtera). Ja mun hálidan dan čuovvulit. Danin lea ge mus ágga odne garvit dánsuma :) Muhto mun gal láven liikot dánset, de mun in dieđe manne galggašin dan garvit...

1798

Odne lea barggus geassefeasta, ja mun lean dohko. Ledjen ráhkanan dollet Stuorajávrgáddái, muhto dál go ballet arvimis, de eat šatta dohko. Mannat baicce bargui fas ja doallat feastta doppe. Unna down, mu mielas, muhto ok, dat gal sáhttá šaddat somá, eahpitkeahttá. Go leat somás olbmot..

Huraidan dego Á..

Somá ahte bođii muitui fas. Kollega logai munnje go gulai mu feaskáris: "Don huraidat dego Á... Mun dál doivon Á lei boahtán ruovttoluotta."

Otná sátni: huraidit, v. nynne, summe, surre; male som en katt

Nytt innlegg

Mun vihken. Mun várra vihken 8 kilomehtera, jus in miilla. Manai gal allright. Dál lean iežan luhtte fas. Vaiban. Twittren muhtun heajos dieđu máilbmái, ja čálán juoidá iežan bloggii. Kanye West odne nai. Ferten rišu váldit ja mannat nohkkat. Lean dál 200 siiddu lohkan girjjis. Rihppaskuvla Nihkaluovttas. Gosan. Ferten dál oađđit bures vai in buohccá.

Jogget arvvis

Logan viidáseappot girjjis. Guldalan musihka. Odne Dexter Gordon ja omd Cheese Cake. Lean veaháš plánen viehkalit unna tuvrraža. Jurddašin 6 kilomehtera jogget njoazit. Amma dat livččii buorre dahkat? Galggašin oažžut muhtuma mielde viehkat. Muhto go arvá de dáidá leat váttis..

Somá odne oaidnit boares rátná, gii bođii fitnat Diehtosiiddas. Ean lean guhkes áigái oaidnalan.

Gávdnen blogga :)

Gávdnen vel Daniel Hernandez blogga: http://rumbonoruega.blogspot.com/ ja son lea čállán min vahkkoloahpa birra Levis go doppe lei Váppu. Loga ášši dás!

Golbma ášši vel

Munnje bođii journalista odne. Mun vástidin jearaldagaide, ja dat šaddá somá gullat mot manai, geasset go sáddejuvvo. In dieđe dál vuos makkár beaivvi šaddá.

Girji bođii odne boasttain. Ann-Helén Laestadiusa Ingen annan är som du. Lean lohkan 96 siiddu 320 siiddus. In dieđe riekta maid oaivvildan. Muhtun áššit leat hui somát ja mun boagustan, ja eará áššit fas eai leat nu miellagiddevaččat. Nu go dávja Sámi literatuvrras leat muhtun čilgehusat mat eai leat oaivvilduvvon Sápmái muhto baicce dáža publihkkii, jáhkán. Gal mun muitalan eanet go lean eanet lohkan.

Ruoŧa radios guldalan prográmmii Ligga med P3. Odne lea čiččiid birra. Lea somá gullat. Muhtun doavttir lea vel doppe, ja muitala ahte nissoniid čiččis boahtá vel sekrehta mas lea individuella hádja, ja mánná oahppá dovdat dien hája. Ja vel partner nai dovdá dan, diđolaččat dehe ii.

Monster

Livet är inte rättvist. Ja vuoigatmeahttunvuohta vuolgá dávja giellamáhttimis. Giella addá fámu, ja don massát dan jus it máhte giela. Mun orun Norggas ja danin dovddan muhtumin váttisvuođa. Olmmái logai karbohydráhtaid, don fertet borrat karbohydráhtaid dál dán vahku, jus áiggut vahkkoloahpa viehkat. "Karbohydráhtaid," jurddašin mun. Mii son dat lea ođđa hutkosiid, go mun ledjen skuvllas ii lean goassige sáhka karbohydráhtain, muhto maŋemus jagiid lean muhtumin gullan sáni. Dat ferte gusto leat juoga ođas dien oahpus. Leat kolhydráhtat, buoiddit ja proteinat, ja dasa lassin karbohydráhtat. Nu mun jurddašin. Šadden de jearrat: Mii son diet karbohydráhtat leat? Lei ártet gullat ahte risen, buđehat ja pasta leat karbohydráhtat, muhto okei, dat lea sihkkarit muhtunlágan ođđa sirrenvuohki, mun fertešin dan oahppat. Go dál ollen ruoktot de ipmirdan ahte karbohydráhtta lea Norggas dat mii Ruoŧas lea kolhydráhtta.

Guldalan radio. Boahtá lávlla mii lea áibbas erenoamáš. Monster. Kanye Westain. Ja sus leat olbmát mielde: Jay-Z, Rick Ross, Nicki Minaj. Shit, dajan dušše. Shit! Balddehahtti dego muhtunlágan vampyrfilbma.

1790 Frankrikes revolution, jag bloggar vidare

Lean justa fuobmán ođđa ruovttosiiddu. Lea oalle stuora, oalle sisdoalolaš, ja hui čáppa ruovttosiidu. Gullá Ruoŧabealnuoraide*, muhto earát sáhttet maid ávkkástallat das. Fina don maid mohkki!

www.nuorat.se

Mun ožžon ovdamearkka dihte tipssa mii doalvvui mu Ruoŧa sámedikki ruovttosiidui, gos lea bealljemearkabáŋku, mas sáhttá vaikko mobiillas ohcat mearkkaid sániid vuođul. Mun in ieš máhte nu ollu mearkkaid birra, de munnje ii boađe várra ávkin dán jagi juo, muhto gii diehtá maidege boahtteáiggi birra. Vare mun ovtta beaivvi dieđášin eanet daid birra. Vare mun maid máhtášin daid sirret. Vare mun ovtta čáppa beaivvi sáhtášin suoládit vašolačča heakkaid. Nei, diet maŋemus lei dušše leaika, spivka. Mun in áiggo dan dahkat, eai ge leat mus vašolaččat.

Sátnebáŋku man birra dál čálán lea dáppe.

Muđui lean fitnan álbmotgirjerádjosis odne. Ožžon girjjiid nuvttá, boares girjjiid maid sii eai fuola šat. Ja ožžon CD-skearruid vel lassin. Dál gulan Franz Schuberta Vinterresise - en gjendiktning. Wilhelm Müller lea teavsttaid čállán. Håvard Stensvold lea dárogillii dulkon teavsttaid, muhto nu go dávja lea dán lágan musihkas, lea hui váttis fáhttet sániid ovttaid ovttaid. Seahkanit, mu oaivvis goit, in ge ipmir sáni ge. In sáni ge!!! Musihkas gal áinnas návddašan. Juo, dál gulan muhtun sániid. "Barfotet på isen går han rundt i ring. I hans pengeskål, der ligger ingenting." Maŋemus lávlla: Lirekassemannen, Der Leiermann.

Hui somá lei dieđusge maiddái Nuoraid (dehe Nuoraha, nu go várra galggašii dadjat, dehe vaikko Nuoraga go lea Ruoŧabealde) ruovttosiiddus lea čohkken bloggaid, ja ahte mu blogga maid lea namuhuvvon dies. Gudnejahttojuvvon :)

* Manne Ruoŧabealnuoraide? Ii go gula buohkaide mat besset nehttii!? Juo, nu dahká dieđusge. Hálidin dušše čalmmustahttit ásaheaddji, mii lea Nuorat, ja Nuorat lea Ruoŧabealsearvi. No offense! Lea muđui miellagiddevaš fokuseret riikarájiide ja jearrat geat dollet daid eallimin odne? Gullen muhtun kollegas allaskuvllas ahte sápmelaččaid gaskkas lea čielgaset ja čielgaset rájit riikkaid gaskkas, muhto omd ruoŧŧelaččaid ja norggalaččaid gaskkas ii leat šat dán áiggi nu dehálaš. Mun in riekta ipmirdan maid oaivvildii, muhto registrerejin jurdaga, ja dál almmuhuvvui vel. (Čilgehussan nástemerkii mii lea dás bajábealde.)

sánit

Ođđa sánit:

seaivvás
mávri
mávrresgárri
suhppet fierpmi
suohpa

Áiggun daid ohcat sátnegirjjis, ja iskat leat go mielde. Muhto in dál vuos. Hálidan nohkestit.

Ođasmahttin 14.6.2011, 20:50. Seaivvas lea substantiiva mii mearkkaša "skigardspåle, gjerdestolpe", ja jearaldat lea boahtá go das go loddi sáhttá dasa seaivut. Mávri lea sátni maid in gávnna sátnegirjjis, muhto mu olmmái geavahii dan ovddit beaivvi. In muitte manne álggiime dan birra hupmat, muhto olmmái lea hubmái ja nu gárttaime hupmat mávrriid birra. Lea bahás niehku. Ruoŧagillii mii dadjat "mardröm". Mávri. Ja nu son oaivvildii ahte lei vuohkkáset lohkat mávrresgárri, ovdal neavrresgárri, go diet maŋemus sátni lea nu negatiivvalaš. Goavddis han sáhtášii maid dadjat dasa. Ja de vujiime Suohpatjávrri meattá, ja olmmái jearai ahte dieđán go mun maid dat mearkkaša. In mun diehtán. Logai: Suhppet fierpmi, bálkkestit fierpmi. Suohpa lea fas "overgangssted, grunt sted (i elv); sted hvor folk og (eller) dyr kan slippe over eller forbi noe; passasje", nu go čuožžu Kåven-Jernsletten-Nordal-Eira-Solbakka sátnegirjjis Sámi-dáru sátnegirji.

Sávrodat

Ledjen plánen mannat Supmii, muhto dál ii šaddan nu. In gávdnan sáhtu. In vuos. Ja lean álgán veardádallat sihkkelastit dohko. Šattašii gal sihkkelastit oalle máŋgga diimmu, sihkkarit 6. In dieđe gillen go.

Lean oađđán maŋŋil barggu. Mun dárbbašin dan. Lean bargan garrasit. Lossa barggut. Muhtun bargit orrot nagodeamin bargat nu ollu, earát fas váibet. Lean lohkan Born To Run-girjjis ahte sávrodat lea olbmo olmmošlaččamus iešvuohta. Sávrodaga bokte mii leat olbmot.

Ja mun maid hálidan leahkit olmmošlaš olmmoš. Mun hálidan leat nu ollu olmmoš go vejolaš, ja danin hálidan sávri leat, nu sávri go vejolaš. Dehe, rievtti mielde in leat fanatista, in mun dárbbaš leahkit nu sávri go vejolaš. Muhto hálidan gal áinnas sávrin leat.

Maid dat mearkkašivččii leahkit sávri? Mot lean sávri? Mearkkaša go ahte mun doalan gitta iežan mihtuide, iežan árvvuide? Vai mearkkaša go ahte mun nagodan viehkat 4 miilla ja 2 195 mehtera oktanaga? Maratonviehkkit leat eahpitkeahttá sávrrit. Lean veaháš jurddašan Maratona viehkat Tromssas muhtun vahkuid geahčen, muhto mun in leat gal čuođi ahte šaddá go nu. Olmmoš ii nagot buot plánaid čuovvulit. Dat lea várra olmmošlaš ášši dat maid.

Ja dál go lean oađđán veaháš, de lean álgán jurddašit pubbai mannat, namalassii Hotellii. Odne han livččii rievtti mielde bálkápilsa, vaikko mii eat leat ollen bovdet olbmuid barggus...

Plikter

Plikter och annat. Jag sitter här på min soffa. Har jobbat hårt, hårdare än andra dagar. Blev medryckt av arbetet, kan man säga. So far so good. Och vidare också: gott. Gott väder. Maŋŋil barggu fitnen Gallerias milkshake juhkat. Lei buorre. Ja eahket lea gollan. Lean fitnan guovtti grillfeasttas.

Muhtumin lea dárbu juoidá dahkat. Lea njulggestaga dárbu dahkat nu go dahká, ii ge leat nu sihkar lei go jur nu don livččet hálidan dan dahkat. Lea dárbu, ja dalle šaddá čuovvut dárbbu.

Mun ledjen poehta odne. In gillen viehkat nu go ledjen jurddašan. Mun in lean gusto odne diet duođalaš olmmoš. In lean jur nu odne. Odne ledjen poehta. Joa. Dál lea várra áigi mannat nohkkat. Ihttin lean Supmii.

Magnus Ekelund & Stålet / Jakob Hellman - Utan er

Somá oaidnit Jakob Hellman ođđa oktavuođas. Sus orru ođđa eneršia. Lea hui buorre oaidnit. Son lea gávdnan olbmáid main juo lea konseapta; dalle son ii dárbbaš nu ollu ballat ahte šaddá feaila ja ahte mahkáš buot fokus gahččá su nala. Heja!

Marica Blind tipsii Hálgublogga bokte.

Dán ija áiggun oađđit radioin nalde. In mun dan jáddat. Go lea nu dehálaš ahte lihkan ihttin :)

Na

Hei blogg,
Ihttin lea plána čorget gealláris, Dieđut-rájus, barggus. Dat gal várra manná bures.
Hei då.

Born To Run - Jakten på löpningens själ

Dál lean vuohon gávdnan miellagiddevaš girjji. Dan namma lea Born to run, ja ruoŧagieldeaddileami vuolletihttel lea "Jakten på löpningens själ". Christopher McDougall lea čállán, ja bures čállán. Ii leat romána. Ja juste dál lean várra rievtti mielde románalohkki. Dat heive nu bures mu vuigŋii ja dillái. Muhto dát reportášagirji lea dattetge nagodan geassit mu mielde. Lea gelddolaš lohkat viehkama birra. Diibmá lohken Murakami "What I think about when I think about running". Dalle liikojin dasa. Dál dovddan ahte juste diet girji hoiggai mu boastoguvlui. Murakamis lei nu beroštupmi mihtidit ja gilvvohallat iežainis. Deattuhan ahte mun liikojin dasa dalle, ja ahte dien dáfus lei buorre girji. Muhto vaikko dovddui veaháš boastut de álgen mun maid mihtidit iežan ovdáneami ja iežan viehkama. Ja dat ii lean buorre. Dál go logan Born to run, de ipmirdan ahte dát vuohki heive mu lundui buorebut, namalassii hupmat viehkama suohttaset beliid birra. Dás boahtá ovdan ahte muhtun indiána viehkkit Mexicos vihket juohke beaivvi ja vel máŋga miilla. Go muhtun amerihkalaččat ledje gávdnan sin 1980-logus ja váldán daid mielde gilvvuide Amerihkas, de bođii čielgasit ovdan ahte dat boagustedje viegadettiin. Sidjiide lei suohtas viehkat. Ja danin manai ge nu geahppasit. Ja de vuite.

Mun maid hálidan gávdnat ruovttoluotta dan áigái go lei suohtas viehkat. Mun lean mun maid oaidnán mánáid viehkamin, suohttasa dihte, spáppa maŋŋil. Dat ii leat trimmen dihte. Lea suohttasa dihte. Ja mun hálidan maiddái nu viehkat :)

Ođasmahttin 7.6.2011, 23:00. Born to run. Joa, dat sáhttá stemmet. Girjji teasa han lea ahte mii leat olbmot go mii viehkat, dehe ahte homo sapiens lea menestuvvan nu bures máilmmis go mii leat viehkan, go mii leat falit leamašan viehkat. Antilopat ja jaguarat leat maiddái falit viehkat, muhto sii eai nagot viehkat seamma guhká ja guhkás go mii. Dat vihket gal jođáneappot go mii oanehaš gaskkaid. Muhto de bággejuvvojit bisánit ja vuoigŋat dassážii go goruttemperatuvra manná vulos. Dain ii leat oainnat vejolašvuohta kontrolleret vuoigŋama nu go mis lea. Dat vuigŋet sisa oktii juohke háve go julggiid bidjet ovddosguvlui. Dat leat nie koblejuvvon. Olmmoš sáhttá válljet man ollu áigu vuoigŋat, ja nu sáhttá viehkat guhká, ii ge dárbbaš bisánit ja vuordit dassážii goruttemperatuvra lea njiedjan. Mii sáhttit válljet eanet vuoigŋat, ja dalle manná vulos viegadettiin. Jurddašan veara. Ja girji lea muđui ge lohkan veara. Dál ii leat go 10 siiddu vel lohkat, ja de mun gearggan.

Ođasmahttin 7.6.2011, 23:55. Ja. Ii lean bahá. Buorre girji. Born to run - Jakten på löpningens själ. Grymt bra bok. Oaččui mu hálidit viehkat ain eambbo. Ja buot deháleamos, dehe buot čielgaseamos mearka ahte duođaid lei buorre girji: Dat oaččui mu dovdat: Juo, muhto juste nie han lea - mun han lean vásihan dan, ja mun lean geahččalan nu lohkat olbmuide. Muhto träningsfreakat eai leat hálidan gullat, go mun logan ahte buot deháleamos lea ahte lea somá. Ii leat nu nøje mot viehká dehe man dávja - buot deháleamos han lea ahte lea somá, ja ahte viehká dan dihte. Sullii nu. Ja girjjis meannuduvvui juste dát suohtas bealli viehkamis. Ja danin lean ge nu duđavaš. Muđui ge lean hui imponeron go sisttisdoalai nu olu dehálaš dieđuid, maid mun in diehtán. Somás lohkanvásáhus! Peace.