2011/03/27

Buori lihkus vástidit presideanttat

Mattias Åhrén geahččala jáhkká ahte sámivuohta dáidá ollasit jávkat Suomas guovtti buolvva siste. Buori lihkus vástidit presideanttat sihke Suoma- ja Norggabealde ahte sudno mielas ii oro nu heajos dilli go Åhrén dadjá. Munnje lea buorre gullat dan, ja lohkat dan NRK ruovttosiiddus, go mun veaháš eahpidan lea go nu buorre doallat čearddaid nu čielgasit eret nuppi nuppis go diet dutki oaivvilda:

http://www.nrk.no/kanal/nrk_sapmi/1.7564657

Márjjábeaivvit Heahtás

Ledjen ikte Heahtás, Márjjábeivviin. Lei buorre. Ja de lei buorre beassat ruoktot. Dál lean oalle forpmas, ja mun árvvoštalan faktiskt čuoigga mannat. Beahcegašvárrái dehe dušše meahcis dás badjin (seamma guvlui fal, vuoskkujávrái...), vaikko lean buohccin leamašan.

Lohken aiddo buori krönika Samefolketis, maid Per Josef Idivuoma lei čállán Johkamohki márkaniid birra. Somá! Bures čállon, ja go bures čállon sámegielteavsttat almmuhuvvojit Samefolketii, de boahtá nu čielgasit ovdan ahte lea juoga eará go jorgalusat. Go ruoŧagielteaksta lea jorgaluvvon sámegillii, de sáhttá dieđusge leat somá dan lohkat, muhto dat lea áibbas eará go teaksta mii lea čállon sámegillii. Copy-writer, vai manin dat gohčodit čálliid mat buvttadit teavsttaid. Mii dárbbašit eanet sámegielat copy-writeriid.

2011/03/26

Double Dream Hands!

Na, mun dieđán. Mu videos eai leat nu somát, erenoamážit eai jus buohtástahttá dákkár videoiguin, nu go dat mii lea dáppe vuollin, maid gávdnen Engqvist's Eleven bloggas.

Eamiálbmogiidda buhtadussan

Ožžon tipssa ahte muhtun risttalaš joavku lea šaddan máksit 166 miljovnna dollara (sullii miljárda kruvnno, jus bures ipmirdan), go leat seksuálalaččat geavahan ohppiid eamiálbmogiid skuvllain, Ámerihkas.

Loga ášši dá: http://www.blueridgenow.com/article/20110326/ZNYT02/103263004/-1/FRONTPAGE

2011/03/25

Filmmat girjerádjosis

Mun lean váldán filmmaid luoikkasin Guovdageainnu álbmotgirjerádjosis. Sherlock Holmes, Supergirl ja Mel Gibson's Apocalypto. Dán vahkkoloahpa gal dáidá šaddat dilli geahččat, go mun lean buohccán. Mus lea miella dál álgit geahččat Sherlock Holmesa. Lehpet go dan oaidnán?

Hei-o-lango-lo-lang

Káfe jugan, lakcajieŋa boran
ja banána, sarihiid ja halloniid
Leat nu njálggat.

buohcci

Guldala Sančuari skerrui Stállangazza. Lean buohcci, in nagodan bargui mannat. Lean oađđán olles beaivvi, ja dál bassán biergodáiggi ja borran. Lei hui njálggat. Šattai diekkár ruitu, Todo vai Toro vai mii nu leš.

Lean váibbas dál maid. Manan nohkkat.

2011/03/23

Videoblogg 23.3.2011


Ja mun dieđán ieš maid ahte sátni "jeahkit" ii várra heive nu bures diehko. Muhto mun in dalle gávdnan eará. Livččen galgan dadjat "hálidit" dehe juoidá.

bar...

Lea leamašan nu ollu. Ja lea ain nu ollu. Mun in olle blogget ge. Go lea friddjaáigi, de... de ii leat aŋkke friddjaáigi, danin go leat nu ollu áššit ja barggut.

Lea gal veaháš buoret dilli dál. Ii leat šat seamma ollu áigemearit. Muhto hui ollu bargu. Leat maillat maid mun in leat ollen rahpat ge. Huffa. In vahkus ge. Dat ii leat buorre.

Muhto odne áiggun lávlut, Dimitri-joavkkuin lávlut :)

2011/03/19

Litt-festas

Dáppe Upmis manná bures. Ikte manai bures, ja odne maid manná bures. Dál mus eai leat šat makkárge dehálaš doaimmat. Lean oastán klassihkalaš sabehiid, ja čuoiganskuovaid ja soppiid. Hui somá. Ožžon veahki mu buori olbmás S:as. Hui čeahppi, dárkil ja duođalaš. Somá! Máksen 4 000 Ruoŧa ruvnno. Sávan ahte manná bures daid váldit girdái ihttin. Lohpidan muitalit. Jus muittán. Dovddan ahte mun lean veaháš láhppon dán áiggi. Nu go ovdamearkka dihte ahte lean diŋgon girdi ihttin Áltái, ja dat ii olle dohko ovdal 23-áigge. Mot mun dalle beasan Guovdageidnui? Ja dasa lassin lean fuobmán ahte ii leat busse mánnodaga iđđes árrat. I am kind of lost. Mun han ferten leat barggus mánnodaga. Mot mun dán čoavddán? Give me an answer.

Odne maid vearddádalan fitnat olgun. Lea vissa muhtun Litt-fest-feasta muhtun teáhteris.

2011/03/16

Gikta Áltái

Čohkkán barggus. Livččii buorre jus livččen nagodan barggu bargat. Muhto in. Mun dušše vuorddán. Vuorddán givtta mii galgá mu doalvut Áltái. Ja mun lean juo váiban. Ja diibmu lea fargga 23.

Ihttin iđđes árrat girddán lulás. Áiggun Ubmái. Ledjen doivon ahte galggai iđđesbusse diibmu 04:45, mun ledjen oainnat doivon ahte manná juohke árgabeaivvi, muhto dál lean fuobmán ahte ii mana go mánnodagaid, gaskavahkuid ja bearjadagaid.

Lihkus gávdnen givtta. Ja dál čohkkán dihtora ovddas gáfe juhkamin...

Ijaid miehtá

Mun muittán mot lávejin čohkkát ijaid miehtá, dehe in fal ijaid miehtá muhto goit 3-4 rádjái, vuosttaš dásis iežan luhtte, go váhnemat ja mu oabbá ođđe nuppi dásis, go ledjen joatkkaskuvllas. Lávejin muhtun geahččaleapmái oahpahallat...

Dan maŋŋil in leat gillen gohcit ijaid barggu dihte. Na juo, lean dieđusge, go lean čállán girjji ja bargan priváhtta prošeavttain. Dalle gal lean muhtumin gohcán. Muhto in maŋemus jagi goit. In maŋemus jagiid, rievtti mielde. Dál dovddan ahte mun gozán fas, seammaládje go dalle nuorran. Čohkkán bargguin, vaikko lean ruovttus. Lea juogalágan áigemearri ihttin, diibmu 9, go mis lea čoahkkin barggus. Mun hálidan dassážii geargat ovttain teavsttain. In olles raporttain, muhto hálidan ollet nu guhkás ahte earát mat bohtet čoahkkimii oidnet vejolašvuođa joatkit dáinna prošeavttain ja čađahit dan. Lea raporta, mii galgá Ministtarráđđái mánnodaga.

Mus lea ain muhtun kapihtal, maid livččen galgan čállit. Ii leat go siidu vel, muhto mun in dieđe nagodan go. Jurddašin ahte mun várra nagodan, jus álggus bloggen veaháš. Muhto mun in leat sihkar. Mun lean váibbagoahtán...

2011/03/15

Sofia & Anna - Du Calmmit (your eyes) - 2000

Šoppenbeaivi

Odne lean šoppen. Lean ođđa mobiilla oastán, HTC Wildfire. Fitnen de eahkedis sisbandy spillet, ja dalle gullen ahte J lei oastán seamma mobiilla muhto mihá hálbbibut Ruoŧas juovlaluomus. Muhto ok, mun lean aŋkke duđavaš.

Osten maiddái Orbina vuosttaš skearru. Osten sin nuppi skearru máŋgga jagi dassái, muhto easkka dál osten vuosttaža. Lea buorre. Somá gullat dieid boares luđiid. Ja sis lei dalle hui čeahpes saksofonista, dan gal ferten deattuhit. Erenoamážit čeahpes olmmoš, mu mielas. Buorit juoigit maid.

2011/03/13

Allaskuvllastudeanttat bloggejeaddjit Nunavutas

Sihke Hellin ja Siv Káre leaba bloggeme doppe nuppi beal ábis.

Hellin goes to Nunavut: http://nunavut11.livejournal.com/
Sivkare Nunavutas: http://sivkare.blogspot.com/

Dat lea dieđusge somá ahte mii beassat čuovvut min studeanttaid go mátkkoštit stuora máilmmis :)

Nunavut lea okta stuora guovlu Davvikanadas. Mun in leat goassige leamašan doppe, de mun in sáhte nu olu lasihit áššái. In dál vuos.

Luođit ja nu ain

Lei buorre vahkkoloahppa. Ollu somás vásáhusat. Ledjen mielde lávlumin ikte Sámi jienaiguin Báktehárjjis. Ja mis lea olles vahkkoloahpa leamašan koarrahárjehallan Diehtosiiddas. Lean oahppan ollu luđiid ja lávlagiid. Buot mearkkašahttimus lei Leage leage, Áillohačča Leage leage liekkas, leage leage linis, leage leage liekkas... Dat lea duođas fiinna lávlla, ja hui erenoamáš go erotihkka lea nu rabas das:

Visot visot válddán dus mun
Visot visot oaččun dus mun
Visot visot attán dutnje.

Dovdat iežas nuppi lahka
Dovdat iežas nuppi siste
Čábbábut go gávnnalivččen.

Leage leage leage liekkas
Leage leage leage linis
Leage leage leage liekkas.

Wow! Somá dan oahppat. Mun in lean oba gullan ge dan ovdal. In dieđe guđe skearrus dat lea almmuhuvvon. Erenoamážit fiinna lávlla.

Ja de lean maiddái fitnan olgun Marrasis sihke bearjadaga ja lávvordaga. Doppe lean gullan luđiid ja lávlagiid, ja doppe ledje maid čeahpes musihkkarat. Okta luohti, maid bearjadaga gullen, eh, na mun in dieđe riekta mot mun galggan dán čállit, muhto dat lei spesiella vásihus, ja mun áiggun dan luođi oahppat. Mun sihkkarit čilgen eambbo dán ášši birra muhtun eará hávi.

2011/03/10

Poeten Ville

Mun galggan boahtte vahkus (bearjadaga) searvat festiválas man namma lea Littfest (ja mearkkaša Litteratuvrafestivála). Littfesta ruovttosiiddus oidno mu govva: http://www.littfest.se/index.php?option=com_content&view=article&id=180:fredagskvaellens-litteraera-festligheter&catid=10:foerfattare

Mun áiggun lohkat muhtun divttaid iežan diktagirjjis Dagar i Kautokeino. Muhto mun lean maiddái lohpidan lohkat juoidá sámegillii. Upmi sámesearvi lea bivdán mu nu dahkat. In dieđe riekta mii šaddá. Kánske ollen álggahit ođđa prošeavtta sámegillii. Mus lea okta jurdda. Muhto mun in dieđe riekta ollen go.

Fitnat čuoigat

Mis lea personalseminára leamašan ikte ja odne. Lei hui buorre. Dál áiggun geahččalit čuoigat veaháš eatnoráigge ovdal go beaivváš jávká.

2011/03/07

Mäster Olof livččii dál deavdán 100 jagi

Olof Lagercrantz. Mun in leat lohkan nu olu girjjiid sus. Orun muitimin ahte son čálii "Om konsten att läsa och skriva" dehe juoga diekkár. Ja de lean bláđestan dehe lohkan girjjis Gunnar Ekelöfa birra. Lean ožžon buori gova sus. Čeahpes olmmoš. Kritihkar.

Logan su birra dán artihkkalis, man Horace Engdahl lea čállán. DN:as. Lagercrantz lei vissa dehálaš Ruoŧas, ja son diđii dan ieš. Son čálii beaivegirjji. Dál addet olggos su beaivegirjji. Mun áiggun dan lohkat.

2011/03/06

Vuotnánnjuovčča

Gávdnen ođđa sáni sátnegirjjis:

vuotnánnjuovčča, vuotnánnjuokčamat s. svigermors tunga

Lea somá jurddašit manne dat lea beassan mielde sátnegirjái. Lea muđui somá jurddašit makkár laktašuvvan sánit gávdnojit sátnegirjjis, ja mot sátnegirječállit leat ákkastallan daid. Biilavuodji ii leat mielde muhto biilalihkohisvuohta. Mearrasápmelaš, mearramárfi, mearragoaskin ja mearrafanas leat mielde, muhto mearrarievvár ii leat mielde. Dál human Kåven et al Sámi-Dáru sátnegirjji birra. Sammallahti/Nickela Sámi-Duiskka sátnegirjjis lea mearrarievvár maid mielde, ja vel biilavuodji. Kåven et al girjjis ii leat feminista mielde, Sammallahti/Nickela girjjis lea feminista mielde, muhto feministaspiidni fas ii. Ja odne mun gullen sáni hennet, muhto dat ii leat mielde makkárge sátnegirjjis. Ipmirdin dattetge sisdoalu ;)

Disdaga lea nissoniid beaivi Guovdageainnus ja buot eará sajiin máilmmis (jáhkán). Mis lea juoigankonsearta Dimitrij-joavkkuin Kulturviesus. Doppe leat muđui eará doalut. Bohtet ja čájehehket iežadet doarjaga dásseárvobargui. Mun jáhkán ahte lea eanet dárbu go goassige ovdal. Nei, dat ii leat várra eanet dárbu dál go goassige ovdal. Muhto ášši lea ahte mun lean álgán eahpidit manná go rievttes guvlui. Ovdal lean álo jáhkkán ahte manná rievttes guvlui, ahte mii olahit dásseárvvu dievdduid ja nissoniid gaskkas čuođi jagi geahčen sullii. Muhto dál in šat dieđe olahit go mii dan, jus ná joatká.

Ruvhten sijte ja Ođđasat

Gea man ollu kommentárat! Dán áššis leat vissa ollu oaivvilat :)

Ja guldal muđui maiddái Biblioteketii, mii sáddejuvvo Ruoŧa radios. Maŋemus sáddagis lea Sápmefokus. Das gullo earret eará Kristiina Utsi DAT:as, John Erling Utsi Sámi kompanias ja sáddaga loahpas hui reflekterejeaddji ja rabasmielalaš Harald Gaski Tromssa universitehtas.

Ängslig

Mun hálidan čállit ängsligheta birra. Muhto mun in astta dál. Mun ledjen gal oalle ängslig odne. Dat bođii ovdan guktii seamma beaivvi.

Ođasmahttin sotn. 16:25. Ängslig. Gullen radioprográmmas mannan čávčča, ahte ängslighet lea sárggastat mii gullá juvddálaš bártniide. Juvddálaš áhkku gii jearahallui Ruoŧa radios muitalii jearahallái (Stefan Lamm, vai mii su namma lei?) ahte: Don han leat nu juvddálaš, don leat álo orrun juvddálašlágan, mu mielas. "Du har det där lite ängsliga över dig."

Mun in dieđe lea go ängslighet sárggastat mii gullá erenoamážit juvddálaš etnisitehttii. Vai gullá go sápmelaš identitehttii? In jáhke. Vai gullá go Ruoŧa etnisitehttii? Vai gullá go oppalaččat nuorra olbmuide mat jerret menddo ollu?

"Ett utdraget självmord" -nammasaš krönikas (čállon Daniel Björkii ja publiserejuvvon DN:as dás) beassá lohkat John Galliano birra. Vuolggasadji lea ahte John Galliano (gii munnje ii lean oahpis, muhto ok, son lea sihkkarit nu čeahpes bivttashábmejeaddji ja designer go olbmot oaivvildit) lea lihcohallan Diorii dan dihte go son lea videos muitalan ahte son ráhkista Hitlera, ja muđui ge hupman rasisttalaččat ja fastit juvddálaččaid birra. Vuođđu lea ahte muhtun hui čeahpes olbmot eai ráhkis iežaset. Sis lea juogalágan guorosvuohta mii hoigá sin ovddos olles áiggi. Muhto sii eai trivastuva. Sullii nu.

Mot mun dál galggan oažžut dáid diŋggaid oktii? Lean árppu massán. In muitte gosa galgen. Lei juoga maid hálidin dadjat, muhto dál in šat muitte maid. Mun ledjen ängslig ikte. Ja muhtun vuohkái lei eahpesihkarvuohta dasa čilgehussan. Gal mun ođasmahtán dán blogga vel nuppis, jus fuobmán mot jurdda manai.

Ođasmahttin sotn 17:07. Go DN:as lohken dien krönika vuohon, de oidnen ahte lei juo liŋkejuvvon guovtti bloggas. Nuppi bloggas lei oalle ártegis ságastallan, erenoamážit kommentárain. Váldá bajás erohusaid juvddálaččaid ja göteborgariid gaskkas, vitssaid ektui. Geahča ášši dás!

2011/03/05

Bloggat mat rasttildit rájiid

Ruoŧa radio lea sihke ođasmahttán ja buoridan iežas ruovttosiiddu maŋemus áiggi. Erenoamážit čielgasit boahtá ovdan SR Sámi siiddus, gos dál lea nu buorre stiila ja sisdoallu ahte addá dovddu mun-vuoján-rolls-royce. Mun skrollen vulos, logan, ja njuiken muhtun leaŋkka mielde, guldalan koseriaid ja eará ođđasiid.

Otná ođasášši lea bloggaid várás, dehe bloggaid birra, rubrihkas Bloggar växer över gränserna. Čeahpes šurnalista ja bloggejeaddji Sophia Rehnfjell lea jearahallan ja čállán njealji-viđa bloggejeaddji birra, earret eará mu. Artihkkala bokte lean oahpásnuvvan muhtun munnje-goit-ođđa bloggaide, maid mun de lean lasihan iežan blogglistui, olgešravdii. Somá!

Kaffe ja chips

Mun jugan káfe ja boran chipssaid. Jus jugadettiin káfe áigu blogget, de gal manná bures. Muhto jus chipssaid boradettiin fuobmá ahte áigu blogget, de lea vearrát. Bággu bassat gieđaid. Ja de ii oaččo šat borrat daid chipssaid maid ledjen vurken.

Oinniidet go ahte mun njuiken persovnna dáfus, dál eske čálidettiin? Álggus čállen goalmmát persovnnas "jus fuobmá..." ja loahpas čállen vuosttaš persovnnas "ledjen vurken". Munnje lei lunddolaš nu dahkat juste dás. Láven muhtumin geahččalit čuovvut oppalaš grammatihkalaš dehe čállingrammatihkalaš njuolggadusaid/rávvagiid mat gávdnojit, ja dalle láven garvet diekkár čállima - mun in hálit dalle geavahit juogo presens- ja perfekthámiid dehe imperfekt- ja pluskvamperfekthámiid. In láve daid seaguhit nu beare.

Dán máilmmis leat earát maid, mat jurddašit grammatihka ja stohket dainna (nu go mun goit odne dahken;) lea Ellen Oddveig Hætta, gii lea duddjon sániid Sámi radios oba vahku. Erenoamážit bearjadaga grammatihkkastoagus lei earálágan. Muhto olles vahkku lei somá. Váldet fal áiggi guldalit, jus ehpet leat daid juo gullan.

Dál mun áiggošin káfe deavdit gohppui fas. Goalmmát hávvi :)

2011/03/03

Nu lihkolaš :)

Dat lea vissa nu ahte eallin lea... Na. Eallin lea eallin. Ja dat mearkkaša ahte muhtumin lea vuosttu ja muhtumin fas miehtálat. Muhtumin illu ja muhtumin juoga eará. Odne lean veaháš ilus. Mun dál muitalan manne. Mus leat guokte ášši.

Mun lean lihkolaš gii lean beassan oastit Britta Marakatt-Labba girjji Broderade berättelser (Embroidered stories / Sággon muitalusat). Nu čáppa girji, ja nu ollu čáppa sággon govat. Aistton Britta, Sággon muitalusat. Leat nu ollu fiinna govat. Mun lean nu lihkolaš, ahte mus ledje diet 300 kruvnno, vai lei go 270 vai man ollu dál lei, ja ahte mun de bessen dan oastit sus go son lei dáppe. Dat lea nu fiinnis. Aah, mus eai leat sánit. Ferten eará háve eanet sániid čohkket ja čállit juoidá jierpmálaš dan birra. Dál mun in nagot go rámpot. Muhtun čáppa beaivvi galggašii dieđusge geahččalit dadjat juoidá konstruktiiva ja bidjat muhtunlágan perspektiivvaid daidda govaide. Muhto diet čáppa beaivi lea eará beaivi. Vaikko lei gal oalle čáppat odne, fiertu, ja hui ollu biegga, ja de bođii fáhkka diet stoarbma, borga, dat muhtii várra kvártta. Ja de fas čáppat vuostten.

Juo, diet lei nubbi ágga, manne lean ilus odne. Nubbi ágga lea fas dat ahte mu girji lea árvvoštallon Altapostenis. Liv AS Pedersen lea árvvoštallama čállán, ja mun lean nu ilus dan dihte, ja sisdoalu dihte. Ja buot suohttaseamus lea ahte son guktii čállá "Ville og hans kvinner". In mun livčče dieđusge ieš nu čállán dien. Muhto somás gova gal addá, go nu čállá, ja dan dihte lea buorre. Ja muđui ge ferten lohkat ahte mun lean eambbo ja eambbo heteroseksuella šaddan jagiid mielde, ja dál in šat oba geahča ge dievdoolbmuid seamma čalmmiiguin go nissoniid. Lea dieđusge veaháš suddu, go mun rievtti mielde jáhkán ain - perfeakta máilmmis - ahte dásseárvu boahtá máilbmái easkka dalle go mii buohkat leat rahpasat ráhkásnuvvat dievdduide nu go nissoniidda... Muhto diet lea dušše mu "politihkalaččat rievttes" oaidnu, ieš in duostta šat dievdoolbmuiguin cummástallat :) Ja nu šaddá ge: Ville og hans koner, nei ándagassii: Ville og hans kvinner.

2011/03/02

Ártegis ságat

1. In dárbbaš muitalit gos ledjen. Gullen ártegis ságaid. Olmmoš, gii vissa čuovvu mu blogga, muhto gii ieš ii sámás nu dávja, logai dárogillii: Na jearaldat lea dušše goas don áiggut álgit blogget ruoŧagillii? Mun vástidin ahte dat maid mun hálidan dadjat, dat ii leat nu dehálaš. Deháleabbu lea ahte beasan oahppat giela. Manne mun livččen galgan álgit blogget ruoŧagillii, ja maid livččen dalle galgan čállit? Mun lean veaháš geahččalan oktii dehe guktii, muhto das ii šatta mihkkege. Diet cealkka sus (dehe jearaldat) lei sihkkarit oaivvilduvvon positiivvalaččat, dego "dus leat nu ollu miellagiddevaš áššit", muhto mun válden dan vuostá nuppi guvlui, dego juogalágan kritihkka sámegielat servodahkii.

2. Okta somás ja buorre vásihus odne lei Boddu. Sihkelastidettiin ruoktot fitnen boradeamin Bottus. Doppe lei stuoragovat TV ja njálgga pizza. Ii ge lean nu divrras. Ožžon beali mielde ruoktot, go in nagodan borrat visot. Lei hui somá Bottus. Ferten doppe fitnat nuppis maŋŋil barggu.

3. Mun nu váillahan muhtun diŋggaid mat mus leat leamašan ovdal. Váillahan iežan... Na in mun gille dás čállit visot. Muhto jorbasit sáhtán dieđusge čilget ahte mus lei eambbo miella hutkat diŋggaid ovdal, mus lei eanet miella geahččalit... Dál mun in šat nagot maidege.

4. Buorre idja!

Go massán kontrolla

Mus lei kontrolla ovtta gaskka. Dál lean dan fas láhppán. In nagot šat doallat dan sajis. Ja dan dihte váibban. Muittán bures mot lei ovdal juovllaid, ja muittán bures mot lei maŋŋil juovllaid. Ja de moadde vahku áigi, de lei mus buorre johtu, ja mun gergen buot maid galgen. In buot. Muhto dan mađi ollu ahte ledjen duđavaš. Ja dan dihte manai bures. Dál lea fas šaddan nu lossat go lea muhtumin. Barggus. Ja earret bargu ii leat mus nu ollu.

Geahččalan, ja de vuollánan vuohon

Muhtumin jurddašan ahte dál lea áigi álgit hábmet iežan logg-čállosiid dego juogalágan johka, dego johka mii golgá liđbmes johkan. Dalle oaivvildan ahte galggan juohke beaivvi čállit juoidá, ja buot beivviid sullii seamma ollu. Vai lohkki oažžu maid vuordá.

Muhto dat ii mana.

---

Mun in šatta mannat koarrahárjehallamii odne. Mun manan ruoktot. Lean nu váiban ja de lea borranmiella maid. In leat oahppan borrat áiggil. Lea nu suddu ahte lea nu ollu maid ferte oahppat dán eallimis...

Rehketdoallu mii ii stemme

Vaikko mun in reagere seamma engagemáŋggain go Áili Keskitalo, de ferten goit čujuhit NRK Sámi artihkkalii Johan Mikkel Sara birra. In veaje kommenteret ášši. Sáhtán dušše lohkat ahte ovddit várrepresideanta Johan Mikkel Sara ii leat várra nu somás dilis. Jus geahččá gova, de sáhttá jurddašit maid son dál jurddaša. Muhto de sáhttá maid jurddašit ahte govva lea sihkkarit boaris. Váldon 2007:s árvideamis.

Egil Olli lea vissa dál gearggus heaitit ovttasbargamis. Loga eanet dán artihkkalis!

Govat maid válden ikte

Diehtibehtet go mii dát lea?

Na juo, artihkkalat ja čállosat čállima ja lohkama birra. Allaskuvllas lei ikte dutki, gii vissa lei erenoamáš. Su namma lea Arne Trageton ja kurssa dehe logaldallama namma lei: Å skrive seg til lesing.
Go ruoktot ollejin, de ledjen Irlánddas ožžon boastakoartta. Lei somá lohkat.


Lean oastán ovtta apelsiinna. Dehe rievtti mielde osten guokte, muhto nuppi lean juo borran.

Lean maiddái oastán njálggaviinna. Lean oahppan ahte rukses viinnaid ektui galgá čuovvut hattiid. Mađi divrraset viidna, dađi buoret. Sihke máhkku ja mirku. Dan dihte oasttán ge divrras viinnaid. Muhto jus jugan? In-e, in mun nu dávjá. Dušše oasttán. Suomas. Ja de attán skeaŋkan, nu dávja go beasan.

Govvejin iežan girjehildu maid.

Ja skájaniid, maid bokte musihka gulan.

Dál logan girjji, man lean girjerádjosis luoikan.

Dá lea mu skáhppe.

Ja dá lean mun. In oro gal nu ilus, muhto já já.

Dá lea okta reive, mii lea orron dál muhtun áiggi. Mun in liiko reiviide nu bures.

Mu váhnemat riŋgejedje :)

2011/03/01

Lea go várra girjji vuosttaš albma árvvoštallan?

Š lea boahtán. Lea nu somá - Dagar i Kautokeino lea árvvoštallon, ja oaččui 4/6 Š. Lean dieđusge hui duđavaš. Álggus ahte árvvoštallojuvvui - girji han lea ruoŧagillii! Ja muhtun čáppa sánit: "Dannego lea nu rabas ja rehálaš, lea álki identifiseret čálliin ja su dáhpáhusaiguin. Erenoamáš čáppagirjjálaš vásáhus sámi birrasis."


Åh, mun lean nu ilus go ožžon diekkár árvosániid. Dát lea várra girjji vuosttaš albma árvvoštallan almmolašvuođas, dehe buorebut daddjon almmolaš preassas (muhtun bloggain ja vel Facebookas lea gal juo ožžon rámi, ja dat han lea álmmolašvuođas). Vaikko in leat áibbas oahppan muorranamaid lohkat, de árvidan ahte lea Máret Ánne Sara gii lea čállán árvvoštallama. Jens Martin Mienna Vilges bárru ja Maren Uthauga Ságer somá leat sápmelažžan lea maid árvvoštallon seamma siiddus!!! Lea hui somá geavvat dakkár birrasii, mu mielas. In leat vuos lohkan Mienna girjji, de mun in sáhte maidege lohkat dan birra. Muhto son han lea árvvus adnon girječálli, dan gal sáhtán sihke mieđihit ja muitalit. Máilmmi buorre giella lei su ovddit girjjis, dan mun fuobmájin, vaikko in juste dalle nagodan lohkat girjji bearpmas berbmii. Ja diet Ságer somá leat sápmelažžan lea beare nu buorre. Eahpitkeahttá. Ártet ja buorre. Earálágan. Ja Máret Ánne ii leat dan birra ge čállán nu ollu. Dušše ahte lea "hui vuogas beassat boagustit iežamet". Sullii seamma ollu go lea čállán mu girjji birra. Yes yes yes :)

Dat gusto gidde fuomášumi, jus čállá juoidá erenoamáža. Lea somá oaidnit. Muhtumin gullo ahte ii leat ávki Sámis maidege buvttadit - loahpa loahpas lea dušše sáhka sohkagullevašvuhtii goitge. Muhto mun han in gula rievttes sohkii. In ge gula dieđusge boastosohkii, go gulan muhtun sohkii mii ii leat diđolaš dáppe. Mot nu leš, de lean ožžon fuomášumi girjji várás, vaikko eai leat sogalaš čanastagat mediaide.

Mun lean gal álgán bidjat jearaldatmearkka dien "duohtavuođa" ovdabeallái, go mun in šat jáhke ahte stemme. Lea dieđusge buorre ahte muhtun lea dan formuleren ja cealkán, vai mis lea vuolggasadji, muhto loahpa loahpas ii doala deaivása.

Odne gullen muđui ahte mii eat "čuovo" láhtu, go mii čuoigat. Mii baicce "guorrat" láhtu, nu go mii maiddái "guorrat" luottaid. "Vaikko olbmot dávja lohket: Dál mii čuovvut dien láhtu..." Vai diehtibehtet ;)

Google goes on and on

Shit. Google is of course going on. Barget viidáseappot ođđa áššiiguin. Dál sis lea dáiddaprošeakta, the google art project, man birra beasat dás lohkat. All teaching is digital. Livččii somá váldit muhtun kurssa muhtun universitehtas New Yorkas dehe juostá doppe nuppi bealde ábi.

Ruoŧa joavku Oh Laura lea nu buorre. Sis lea lávlla man namma lea Release Me! Dá lea dan video: