In nu ollu; logan girjji

Galggan go dál viehkat tuvrra? Vai maid galggan dahkat? Livččii dieđusge dehálet áššit, maid fertešin dál bargat, muhto in mun gille. Go eai purre. Mii son diet purret lea ruoŧagillii?

Logan buori girjji. Jaskesvuohta golggotmánus. Alltså dat lea dánskkagillii, čállon dánskkagillii ja mun logan dan dánskkagillii. In ge jáhke ahte lea jorgaluvvon sámegillii. Girjji namma lea TAVSHED I OKTOBER. Čálli namma lea Jens Christian Grøndahl. Gávdnen girjji Diehtosiidda gealláris, jurddašin: "Ii oktage dán váillut jus mun válddán dan iežan lusa ja logan dan, ja du buvttán fas vahku geahčen." Lea sihkkarit muhtun dutki 10 jagi dassái mii lea dan vajálduhttán iežas kantuvrii Kulturviesus, ja dál mun gávdnen dan go ledjen ohcamin diekkár boares gássaid mat leat gártan geallárii, muhto gullet olbmuide mat ain barget min luhtte. (Mii leat geallára čorgemin, go mis lea dilli.)

Mu eanu čálii Facebookas ahte Jens Christian Grøndahl lea sutnje favorihttačállin. Mun in lean ieš gullan Jens Christiana birra. Eanu čálii ahte son lea okta dain moaddásis dán máilmmis mat čállet dovdduid birra dievdoperspektiivvas. "Grøndahl ja Coetzee ja muhtun earát," čálii eanu. Miellagiddevaš! Ja nu go čállen álggus: Lea buorre girji :)

Ođasmahttin 1.6.2011 00:35. Dál lean 170 siiddu lohkan, ja mun lean maiddái lohkan veaháš čálli birra neahtas. Lea ain buorre girji. Mun hálidan diehtit mot šaddá, mot manná. Mus lea dušše 100 siiddu vel lohkat. Grøndahl lea erenoamážit čeahppi čállit. Danin šaddá ge somá lohkat. Mun imaštalan lea go son ieš vásihan visot maid čállá, vai čállá go áššiid man birra lea gullan. Dat orru nu duohta, orru nu čiekŋal, buot jurdagat ja dovddut. Orru nu albma. Go mun logan dákkár girjjiid, de mun dovddan: Okei, gea die, dat lea gusto lohpi guldalit iežas dovdduide nie dárkilit! Lea gusto lohpi beroštit iežas siskkaldas jienas ja duođas guldalit dan. Lea somá. Muhtumin eahpidan galggan go čuovvut iežan siskkaldas jiena, go eai leat nu čielgga duođaštusat muhtun áššái. Lean álo hálidan guldalit. Ja mun láven nu dahkat. Dat láve doaibmat. Ja dál jáhkán ahte mun duosttan dáinna joatkit. Go dát Jens Christian Grøndahl nu jurddašallá ja čuovvu muhtun siskkaldas árppu. Somá maiddái ahte ledjen Københámmanis gieskat giđđat. Dál dovddan muhtun báikkiid man birra čállá girjjis :)

Ođasmahttin 2.6.2011. Mun logan ain. Dál lea dušše bealnot kapihtal vel ja de gearggan. Lean šaddan bisánit dál ja jurddašit muhtun historjjá birra maid mun lean vásihan. Mun oainnán seammalágan kontuvrraid (ruoŧagillii "kontur", ii ge "kontor") girjjis go iežan eallimis. Muhto nuppi guvlui, dehe goit veaháš eará. Ii leat jur juste seamma. Muhto muhtun olbmot gal gávdnojit mu eallimis maid, mat gávdnojit girjjis. Lea miellagiddevaš oaidnit dan. Šattan bisánit smiehttat.