Bortom BNP

Lean dál lohkan girjji: "Bortom BNP. Nationalekonomi och företagsekonomi för hållbar utveckling", maid mu áhčči Peter Söderbaum lea čállán, ja mii lea aiddo almmuhuvvon lágádusas Studentlitteratur. Lea buorre girji. Somá dan lohkat. Lea vuosttaš háve go mun nagodan olles girjji lohkat sus, vaikko son lea ovdal čállán máŋga girjji, ja mun lean duollet dállet jurddašan mun ferten lohkat ovtta. Lean maiddái álgán lohkat, muhto de in leat šaddan go 20-30 siiddu lohkat. Dán háve manai buorebut. Jáhkán ahte girji várra lea buoret go ovddit girjjit. Muhto mun jáhkán maiddái ahte mus lea buoret dilli lohkat dáppe duoddaris.

Peter lea ekologalaš ekonoma, dehe institušonealla ekonoma, jus dat muitala eanet. Son ii leat neoklassihkalaš ekonoma. Dat mearkkaša ahte son eahpida galget go ekonomat dušše bargat modeallaiguin mat muitalit ruđalaččat min servodaga birra. Lea go luvrris geahččalit gávdnat ruđalaš mihtuid buot diŋggaide, vai livččiimet go baicce diehtán eanet servodaga birra, jus mii livččiimet eará modeallaiguin bargan, de jus ekonomat, rievtti mielde, livčče eará modeallaiguin bargan paralleallalaččat boares modeallaiguin? Sullii nu.

Girji ii leat dušše oahppogirji, muhto buoret várra debáhttagirji. Son muitala iežas vásáhusaid birra - maid son lea vásihan universitehtain ja allaskuvllain gos lea bargan. Makkár ideologiijaid ferte doarjut jus galgá bargat doppe dehe dáppe. Ja lea go buorre jus buot dutkiin ovtta ásahusas lea seammalágan máilmmigovva ja ideologia? Vai lea go baicce dehálaš ahte iešguđet oainnut, ja iešguđet dieđalaš paradigmat, bohtet ovdan ja ožžot eallit fárrolaga seamma ásahusas. Dehe dat eai dieđusge dárbbaš fárrolaga eallit. Muhto ahte gávdnojit, ja ahte studeanttat besset eanet go ovtta perspektiivva oaidnit.

Sáhttá dieđusge hui ollu čállit dán girjji birra. Lea 120-siiddosaš girji. Ollu fáttat. Nobel. Ja visot. Globaliseren. Servodat. Ovdáneapmi. Ásahus. Hållbar utveckling, mii dat lea sámegillii? Doallevaš ovdáneapmi, kánske. Čálli deattuha ahte servodat lea soabadan doallevaš ovdáneami dáfus ahte dat lea juoga maid mii hálidit. Muhto mis ii leat oktasaš oaidnu mot dan galgat olahit. Čálli oaivvilda ahte dárbbašuvvojit ođđa perspektiivvat ekonomias, jus galgat nagodit jorggihit máilmmi dán dáfus.

Girjji vuosttaš kapihttala sáhttá lohkat neahtas dás.