Vappu Levis

Diibmu manná. Gea die, mus lea video, dehe rievtti mielde dvd, maid lean luoikkahan. Bázo. Lean gullan ahte lea erenoamážit buorre, ja áiggun dan geahččat. Go lea dilli. Ii leat goassige dilli. De lea. Muhto hárve. Lea nu unnán áigi. Válddán ollu, menddo ollu, bargguid badjelassii. Dán vahkkoloahpa lea Vappu, dehe nu go Ruoŧas lohkat: Valborgsmässoafton, sámegillii várra: Valborgmeassoruohta (kommentáras ohppen ahte lea Válbormeassoruohta, gč vuollin). Jus lea ihttin. Juo, ihttin fal, maŋemus beaivvi mánus. Ja mii de dollet Supmii. Norggas ii ávvuduvvo. Dálvi lea nohkan giđđa lea boahtán, dan mii ávvudit. Boaldit visot maid eat dárbbaš šat. Boares gálvvuid mat leat billašuvvan dálvvi mielde. Mun válddán bargguid maid in livčče várra galgan váldit. Muhto liikon bargat. Lean buori forpmas. Buoret. Lean oađđán ollu. Lei dehálaš. Olmmoš lea nu ođeš giđđat, nu go mu kollega logai munnje odne, go maŋit jovden bargui. Guldalan Johan Kitti boares albumii, Dovddut. Násttážan gal lea albma hitta. Son lávlu olggos, diet Johan. Mun ferten gal lohkat ahte dat lea buorre. In mun várra liiko visot dán skearrus nu hirbmadit, muhto das leat čuoggát, main ii beasa, ja okta guovddáš čuokkis lea ahte son sátse nu 100-proseanttalaččat, ja dat mielddisbuktá muhtunlágan friddjadovddu. Muhto mun in dál sáhte nu ollu smiehttat ja čállit ja formuleret su skearru birra. Mus leat eará skearrut, maid galggan árvvoštallat Samefolketis. Lea hui somá. In leat vuos gullan visot. Guldalan muhtun boares juoiganskearruide, vai mus lea vuođđu buohtástahttit ođđa skearruid. Muhto. Mun livččen gánske galgan baicce bassat lihtiid. Go lean reaissus leamašan, de in leat ollen dahkat dan. Ja ihttin mii han dollet Levii ávvudit Vappu.