Ola Stinnerbom dánsii ja munnje bohte jurdagat

... ja jearaldagat. Árbevieru birra, Sámi birra. In nagodan daid ovttatmano formuleret, ja danin in beassan jearrat doppe. Mis lei oainnat jearaldatbodda. Maŋŋil bottu lei jearaldatbodda, ja olbmot jerre. Muhto mun in ollen formuleret mu jearaldaga. Dat ledje nu ollu diŋggat. Mus ledje nu ollu jurdagat.

Ola Stinnerbom (dehe Kompani Nomad/Ola Stinnerbom) dánsii Juhlsas ikte. Mii leimmet doppe geahččat. Son juoiggai maid. Ja dánsii. Ja čuojahii trumbbu. Ja dánsii. Bovttii nu ollu jearaldagaid. Mun in áiggo čállit nu ollu, muhto mun sáhtán muitalit ahte ledje jearaldagat Sámi ja árbevieruid birra. Son álggii iežas prošeavtta 15 jagi dassái. Ja son lea dán áigodagas oahppan juoigat maid. Ja su juoigan ii leat nu árbevirolaš, jus jearat mus. Son muhtumin álgá synkopain, omd. Dat han lea pop. Mun in leat goassige gullan muhtun juoigi gii orru jaskat ovttežis ja de álgá synkopas. Son lea váldán juoiganteknihka ja ollu osiid juoigamis, muhto son ii leat váldán visot, ii ge oro miella ge juoigat árbevirolaččat. Son hálida dahkat juogalágan popa.

Jearaldagat ihtet go reasta Sápmi lea nu fokuserejuvvon árbevirrui. Mun measta logašin ahte Sápmi lea árbevierru, ja árbevierru lea Sápmi. Nei, diet ii doala deaivása, muhto dat guokte - Sápmi ja árbevierru - leaba nu garrasit náiton oktii ahte ii leat leaika. Ja dat geat hálidit bargat Sámi ovddas ja Sápmái buorren, dat válljejit dávja árbevieruiguin bargat ja ovddidit. Na ok, muhto gosa dás boahtá de ovdáneapmi? Mun in dieđe, mun ferten jurddašit viidáseappot.

Stinnerbom geahččala maiddái ovddidit Sámi dánssa. Ja dalle son lohká rahpasit ahte sus eai leat makkárge árbevierut, man nalde son hukse su Sámi dánsuma. Son lea geahččalan hupmat Sámi publihkain, dánset sin ovddas ja de jearrat maid dovde.

Na na. Lei ollu jurddašeapmi ikte. Ja dat lea dieđusge buorre. Stinnerbom oažžu min jurddašit. Livččii gal somá oažžut muhtun vástádusaid daidda jearaldagaide. Muhto mun ledjen ila njoahci (!) ja mun in ollen jearrat. Ja dál in dieđe. In gille várra sáddet sutnje mailla. Muhto jus oainnán su nuppis, de áinnas jearan. Son logai muđui ahte lei vuosttaš ja várra maŋemus háve son dánsii Guovdageainnus. Son lea boarásnuvvamin, ja su rumaš ii nagot šat dánset nu gálle jagi vel. Ozai muhtuma gii sáhtášii váldit su barggu viidáseappot boahtteáigái.