Mun in dieđe ealán go duođas nu buori eallima go muhtumin jáhkán. Mus ii leat gal eará go dát (eallin). Ja danin ii leat eará go duhtat. Ja nu dagan. Láven hui bures duhtat. Mun ealán eallima mii buktá munnje ođđa vásáhusaid. Mun láven duollet dállet beassat lohkat girjji. Ja girjjit gal sáhttet addit nu ollu. Ja mus lea bargu gos oahpan ollu. Mun jáhkán ahte juohke beaivvi oahpan juoidá, vaikko muhtumin lea váttis dadjat jur maid. Mus lea orrun mainna duđan, dat heive munnje ja das lea visot maid dárbbašan. Juste dál galggašin dieđusge dan čorget ja láhti bassat ja lásiid maid. Vai šaddá beassážiidda hui fiinnis. Muhto juste dál in nagodan. Lea leamašan guhkkes bargobeaivi. Menddo guhkki orui. Muhto ok, dál lean ruovttus. Dihtora ovddas bloggedettiin jurddašan ahte eallin lea áibbas ok.
Áibbas ok. Muhto. Visot ii leat buorre. Gávdnojit áššit ja jurdagat ja olbmot mat njámmet mus vuoimmi. Muhtun dakkár áššit dehe jurdagat dehe vásáhusat dehe dilit leat dakkár áššit ja jurdagat ja vásáhusat ja dilit maid in sáhte sivahallat. Dalle lea áibbas ok ahte njámmá mus vuoimmi. Nu go mu olmmái gii jámii. Váivves ášši, ja eneršia gal manná mus, muhto dat lea áibbas ok. Dat han ferte leat nu go lea. Ja mun dohkkehan dan áinnas. Muhto máilmmis leat maiddái olbmot ja áššit ja jurdagat mat eai leat nu go galggaše. Ja dat váibadahttá. Mun fertešin dieđusge muitalit maid mun oaivvildan go nie čálán. Dat lea nu váivi lohkat dákkár teavstta, go ii dieđe man birra lea sáhka. Muhto mun in riekta hálit čállit ge, in goit nu čielgasit. Oidnen ahte muhtun olmmái lei Facebookas ávžžuhan earáid dahkat juoidá. Ahte mahkáš earát dárbbašivčče dan gullat. Ja mun oaivvildan ahte son ieš berrešii juste dien ávžžuhusa čuovvut. Muhto dan mun in gille čállit Facebookas. Buoret čálán dan deike.
Dat lea várra dábálaš minsttar, juste diet, ahte mii ávžžuhit earáid bargat dan maid mii ieža livččiimet galgan bargat. Dehe mii ávžžuhit earáid jurddašit dan maid mii ieža berrešeimmet jurddašit. Dat lea lunddolaš, ja eallin livččii ain buoret, jus in livčče dárbbašan suhttat dákkár diŋggaide. Eallin lea nu ártet. Mun lean ieš ártet. Vuoi vuoi.
0 kommentára:
Post a Comment