Mun jugan káfe ja boran chipssaid. Jus jugadettiin káfe áigu blogget, de gal manná bures. Muhto jus chipssaid boradettiin fuobmá ahte áigu blogget, de lea vearrát. Bággu bassat gieđaid. Ja de ii oaččo šat borrat daid chipssaid maid ledjen vurken.
Oinniidet go ahte mun njuiken persovnna dáfus, dál eske čálidettiin? Álggus čállen goalmmát persovnnas "jus fuobmá..." ja loahpas čállen vuosttaš persovnnas "ledjen vurken". Munnje lei lunddolaš nu dahkat juste dás. Láven muhtumin geahččalit čuovvut oppalaš grammatihkalaš dehe čállingrammatihkalaš njuolggadusaid/rávvagiid mat gávdnojit, ja dalle láven garvet diekkár čállima - mun in hálit dalle geavahit juogo presens- ja perfekthámiid dehe imperfekt- ja pluskvamperfekthámiid. In láve daid seaguhit nu beare.
Dán máilmmis leat earát maid, mat jurddašit grammatihka ja stohket dainna (nu go mun goit odne dahken;) lea Ellen Oddveig Hætta, gii lea duddjon sániid Sámi radios oba vahku. Erenoamážit bearjadaga grammatihkkastoagus lei earálágan. Muhto olles vahkku lei somá. Váldet fal áiggi guldalit, jus ehpet leat daid juo gullan.
Dál mun áiggošin káfe deavdit gohppui fas. Goalmmát hávvi :)
2 kommentára:
Giitu Ville!! :D
Go leat namuhan mu iezat bloggas ;)
Leage buorre :)
Dušše somá namuhit čeahpes olbmuid, ja erenoamážit jus dovdá daid. Ledje hui buorit koseriat :)
Post a Comment