personvernombud

Ipmirdan dál ahte mun šattan allaskuvlla personvernombud go álggán ođđa virggis. In dieđe mii personvernombud lea sámegillii, muhto dan gal beasan oahppat. Vuosttaš ášši maid áiggun bargat ođđa virggis lea oastit láhkagirjji. Dan jurdagii liikon. Mun in šaddan juridihka lohkat universiteahtas, in ovtta ge čuoggá. Muhto dál oainnán ahte ferten álgit lohkat lágaid ja njuolggadusaid veaháš dárkileappot go ovdal lean dárbbašan. Dat lea somá, ja gáibideaddji. Ferten measta gáibidit alit bálkká dán ášši dihte ;)

Hei
odne lean oahppan
ahte lea hui váttis leahkit suvrris
jus nubbi olmmoš (geainna don humat) lea ilus ja moddjá
Dat lei mu mielas somás diehtu
;)

Somás listu Hálgu-bloggas

Hálggus lea somás lista Sámi buoremus lávlagiid badjel. Fina don maid geahččat. (Dá lea liŋga.) Ihttin ja maŋit beaivvi almmuhuvvo Marica Blind guokte buoremus lávlaga Sámis.

Jurdagat

Mun gávdnen Van Halena MySpace-siiddu. Mun logan dál girjji eŋgelasgillii - Murakami Dance dance dance - ja de oahpan sániid, ja dainna ipmirdan buorebut muhtin fitnodatnamaid mat dál gullet min beaivválaš gillii, muhto maid mun in dovdan ovdal. Nu go YouTube. Mun lean dál odne oahppan ahte tube mearkkaša TV. Lea go mihkkege tubes? Ortnegis. Mun guldalan Van Halena. Mun soaittán fitnat hoteallas odne, in mun dieđe. Oidnen Facebookas ahte doppe leat olbmot. Jurddaš ahte Facebook, YouTube, MySpace lea šaddan árgabeaisátnin dáppe Davvinorggas maid!!! Mun lean guldalan Ruoŧa radiui, lei muhtun diktaprográmma man namma lei Text, muhto otná poehta ii lean nu buorre, mu mielas. Daniel Boyacioglu ieš lea čeahppi, muhto diet Duortnosleahkisuopmalaš Lars Mikael Raattamaa ii doallan čázi. Ångest ångest ångest. Muittuhuvven fáhka ahte Ruoŧŧa lea maid hui unna riikkaš. Láven nu jurddašit go gulan Norgga radio, muhtumin, go eai leat nu čeahpit hupmat, de láven jurddašit ahte Norga lea nu unni, ja ahte Ruoŧa radiui ii beasa jus ii leat hui čeahppi. Muhto dál gullen dien bártni. Sus ii lean mediahárjaneapmi. Jurddaš man buorre lea ahte mii orrut dáppe Sámis, gos duođas oažžu radiohárjaneami! Somá gullat ná olu buriid lávlagiid Van Halensiiddus. David Lee Roth lea duođas hui čeahpes lávlu, son dahká erohusa. Son lea nu buorre. Mun maid hálidivččen lávlut nu go son lávlu.

durgeme lávu

Galbmon veahá julggiin, ledjen meahcis durgeme lávu mu olbmá 30:át riegádanbeaifestii, mii lea ihttin. Šaddá somá. Mu joggenskuovat njuske, ja dál čohkkán barggus, gos eai leat eará skuovat eai ge suohkut. Fertešin sihkelastit ruoktot daid molsut. Muhto go odne lea áigemearri muhtun mátkerehketdeavdimii, de ferten dál čohkkát dáppe. Vaikko hálidivččen mannat ruoktot. Jus in oza buot báhpáriid, ja manan ruoktot daiguin. Dat livččii maid vejolaš. Fyš, mun lean váiban. In hálidivčče dáppe dál orrut. Hálidivččen ruoktot. Ja mu mokta manná nu bajás vulos. Lea veaháš ártet. Lean nu eahpesihkar muhtumin, ja de fas nuppi sekunddas lea visot hui greia, ja mun duđan iežan bargguin ja nu ain. Manná hirbmadit bajás vulos dáid beivviid. Mun in dieđe manne. Lea go dan dihte go mus ii leat guoibmi? Livččen go sihkkareabbu, jus livččii guoibmi mainna beasašin hupmat buot diŋggaid birra?

Ođđa báidi, ođđa stiila

Nu go mun muitalin mannan vahku de vázze Tuvrrahasat Bidjovákkis Ráisii. Mun ledjen mielde, ja duođaštus dasa gávdno Facebookas, gos lean taggejuvvon dán oktavuođas. Mun in ieš buktán govvenapparáhta, earret iežan mobiilla. Mobiillain válden dušše ovtta gova.

Odne lean Juhlsas leamašan. Doppe osten čáppa čáhppes polobáiddi.

Dás dat oidno buorebut.

Mun in oppa deaivan dáinna.

Ja dás fas oidno bures.

Mun lean muđui oahppan juoidá ođđasa (munnje) man namma lea feng shui. Ránjás ožžon girjji luoikkasin, man namma lea: "Ryd op i dit rod med feng shui". Dan dihte šattai somá munnje čorget odne. Ja gea man fiinnis šattai :)

Olmmái gii ii gille čorget.

Mun in ipmir ieš ge ahte barggan dan maid barggan, dehe rievtti mielde ahte in bargga diekkár bargguid maid livččen galgan bargat. Lea hui ártet. Lea buorre ahte orun okto. Livččii heahpat geahččalit čilget manne mun in bargga, manne mun in čorge, manne mun in mávsse dien ja duon rehkega, manne mun in ordne iežan eallima nu ahte šattašii čáppat ja čorgat. Áibbas ártet. Mun in ipmir. Ja danin lean ge veaháš eahpesihkar galggan go mannat singelfestii odne. Jus mus dál livččii diekkár buorre dovdu ahte mun lean buorre olmmoš, dalle livččen roahkka mannan dohko. Muhto dál go in ieš ge lean veaháš ge čeavlái ahte lean buori barggu bargan odne - mii mahkáš livččii sáhttán addit munnje dien iešdovddu mii dárbbašuvvo - de in dieđe. Lea go buoret čohkkát dáppe deattidettiin? Dehe njuolgga mannat seŋgii nohkkat? Maid mun galggan doppe dahkat, jus beare jurddašan ahte mun lean hui ártegis olmmoš, gii in gille maidege čoavdit. Mun oađán. Bassen lihtiid, dan mun dahken, dan sáhtán čeavllahallat, mun bassen lihtiid. Ja mun sihkkon beavddi go ledjen boradan. Muhto nubbi beavdi, soffabeavdi... Manne mun in leat dan čorgen?

Mun sáhtán dieđusge mannat singelfestii vaikko. Mun sáhtán mannat dohko ja čohkkát okto doppe suvrrisin. Dego sitruvdna. Ja jus de muhtun boahtá ja oažžu mu jurddašit eará, de.

Loser

Bidjen NRK Sápmi čuodjat neahta bokte, muhto skájaniin gullui muhtun prográmma reggae birra. Ja dat čuojahedje muhtun Lady Saw-lávlaga. Inspirearašuvven ja muittuhuvven dán lávlagii:


Lean muđui odne čállán mu vuosttaš oanehismuitalusa máŋgga jahkái. Dan namma lea: Bassat isitávdnasa. Dat ii leat buorre, muhto lihkká lea hui buorre álgit čállit muitalusaid.

Muittán maiddái eará Loser-nammasaš lávlaga, namalassii Becka lávlaga. Muitibehtet go?

Gal máilbmi lea ártet...

... Mun lean dat áidna gii lean normála.

;)

telefon

Mun orun ain dáppe. Seamma visttis, dat manná bures, mun lean duđavaš. Ii mihkkege lea rievdan dan rájes go hupmen duinna giđđat. Geahččalan heaŋgut biktasiid olggos, go lean daid bassan, muhto arvá nu dávjá, juohke fucking beaivvi, ahte in dieđe maid mun galggan. Dat várra ii láven nu dávjá arvit. Muhto mun in láven heaŋgut daid olggos ge. Mun in dieđe mot dat goike dalle. Rahpen go lásiid dávjábut, kánske. Mun in diehtán ahte el-rávdnji lea divrras. Dál mun dieđán. Visot lea muđui seamma. Mun lean jurddašan du muhtumin.

Friddjaáigi lea bassi diŋga. Dan lean várra ipmirdan dál. Mus lávejedje nu olu prošeavttat. Dál mun in áiggo šat nie olu. Áiggun geahččalit vuoiŋŋastit go in leat barggus. Mus lea hástaleaddji bargu barggus, nu ahte mun in dárbbaš eará prošeavttaid. Dáiddán almmuhit muhtun boares materiála nehttii, muhto in mun dieđe eará. Áiggun vel ovtta girjji almmuhit bábirhámis. Dan maŋŋil in dieđe.

Mun orun ártegis servodagas. Dáid beivviid lea dieđusge olu hálla Kiwi-gávttiid birra. Facebookas logan guksin guollemuorran. Eatnasat maid mun dovddan leat váldán ášši hui unnohassan. Earát fas meidnejit ahte ii lean nu stuora ášši, ahte diet han ii lean albma gákti. Dat ii leat várálaš - olbmot ožžot daid coggat, dat ii váikkut albma gáktái. Mun ieš in riekta ipmir mot sáhttá ákkastallat ja duhtat dainna jurddašanmálain mii lea, namalassii ahte lea muhtumiidda lohpi coggat juoidá mii ii leat earáide lohpi. Mun in riekta oaččo dien njuolgga. Muhto I guess mun in dárbbaš ipmirdit. Mun sáhtán orrut dán servodagas ja bargat das, bálvalit dan, vaikko in ipmir visot. Dat lea ok. Mun hálidivččen dieđusge atnit juogalágan duođaštus mii muitala ahte dat lea okei ahte servodat lea nu go lea. Dovdo amasin, das in beasa.

Mihá buoret dilli :)

Visot lea dál mihá mihá buoret go ovdal. Mun lean beassan oađđit. Mun oađán juohke beaivvi maŋŋil barggu, muhtumin guokte diimmu. Ja de ihku dieđusge.

Ja de lean álgán čorget barggus. Ja dat manná bures. Manná goit ovddosguvlui.

Ja de lean lohkan guokte girjji lohppii. Nubbi lea Raymond Carvers "Beginners" ja nubbi lea Haruki Murakami "What I talk about when I talk about running". Guktot ledje buorit. Hui somá lohkat eŋgelasgillii :)

Teaksta ja govva Sameradiui.

Mun lean menestuvvan koseriijaid dáfus. Olbmot leat gullan daid, ja sii rámpojit daid - lohket munnje ahte lei somá gullat mu filosofereme. Návddašan juohke sáni maid gulan. Lea hui somá.

Odne lean radiui sádden gova maid válden alddán mannan giđa. Liikon dan ivnniide. Mu liiki lea dán govas veaháš čábbát go dábálaččat, meidnen. Muhtumin, go čuovga lea riekta, de šaddá buorre. Válden dan dáppe viesu duogábealde.

SR Sameradion bidjá de mu gova Buorre iđit Sápmi-siiddu koseriisiidui. Mun čállen maiddái teavstta maid almmuhit dohko. Čállen ná:

Ville Söderbaum lea Uppsalas eret. Son lea ráves olmmožin orron ja gázzán oahpu Teheranas, Guovdageainnus ja Stockholmmas. Dál orru Guovdageainnus, gos bargá dutkanráđđeaddin Sámi allaskuvllas.

Mot dat orru? Dohkke go?

Viimmat veaháš kreativiteahtta

Somá, dál lea viimmat muhtun olmmoš, namalassii Anne Berit Anti, ipmirdan ahte dáidá leat luvrris oaidnit potensiálaid Kiwi-biktasiin ja Kiwi-rámbuvrri hutkáivuođas :)

http://nrk.no/kanal/nrk_sami_radio/1.7290558

I like :-)

muhtun jurdagat

Logan Murakami "What I talk about when I talk about running". Lea somá. Guldalan Michael Jacksonskerrui "Dangerous" ja jur dál lávlaga "Black or White". Lean ruovttus, iežan Jávrrašdievváseaŋggas. Ledjen mátkkis, ikte ollejin ruoktot. Ledjen Oslos. Mátki lea váikkuhan mu jurddašit. Vásihin proffaruvvema ovddit beaivvi, ja dat rabai muhtun kanálaid. Čohkkájin buljárdanbádas ikte. Dál lean dáppe fas, basan biktasiid. Lean borran juogalágan iđitborramuša. Galggašin fitnat Remas odne, go leat nu unnán gálvvut galmmihanskábes.

Mun odne oidnen ahte lean čállán 1500 ášši iežan bloggas, muhto seammas dovddan ahte dat ii leat dehálaš. Juste dál lea nu olu eará áššit mat váldet mu fokusa. Okta ášši mii duođas gáibida juogalágan kommentára - vaikko in dieđe makkár - lea Kiwi-rámbuvriášši man birra beassá lohkat dás: http://sideoppsidened.livejournal.com/82051.html. Mun in leat ieš goassige oaidnán Kiwi-gávppi gostege. Dan dihte lea váttis oaivvildit maidege. Munnje ii oro nu issoras go orru earáide. Sii geahččalit juoidá bargat. Mun in jáhke ahte sin mihttomearri lea iešalddis fasti. Munnje bohtet hui ollu jurdagat, maiddái váivves jurdagat. Lea veaháš lossat.

Lean diŋgon ruvvenáiggi dál 18:30

Lea duohta, mun lean diŋgon ruvvenáiggi dáppe dán SPA:as. Mun in leat ovdal mannan albma prof-ruvvejeaddji lusa, de mun in dieđe makkár dat lea. Lean diŋgon 20 minuhta. Álgá 25 min geahčen.

Mun láven návddašit go ruvvejuvvon. Láven maiddái luoitit muhtun sániid dehe jienaid olggos mu njálmmis ruvvejuvvodettiin. Mun in dieđe lea go nu vuogas dahkat dan dál... Ferten veaháš iskat makkár lea go galgá albma leahkit.

Muđui in dieđe mot galggan ráhkkanit ruvvemii. Jurddašin measta fitnat doppe dál, veaháš ovdal, ja jearrat lea go vuogas veaháš vuojadit dehe rišu váldit dehe juoidá. Galgá go liekkanit ovdal go álgá?

Mun logan Aftenposten

Mun lean Sonas, olgobealde Oslo, muhtun hui fiinna SPA-hoteallas man ruovttosiiddus lea dás: http://sonspa.no/

Dáppe lean viežžan Aftenposten. Logan dan ja návddašan. Árvvoštalan dan doallat. Máksá 3546 ruvnno jus áiggun dan olles jagi. Ferten veaháš jurddašit. Muhto livččii somá. Orru leamen buorre aviisa.

váiban

Fyšš o fyšš, mun lean váiban. Hálidivččen beare oađđit. Muhto. Lean lohpidan čuovvut Tuvrrahasaid Biedjovákkis Reisii. Ihttin mii vuolgit, ja de vázzit gitta sotnabeaivái. Ja mun in nagot. Mun lean juo dál váiban. Vuoi vuoi. Dát ii leat buorre. Mun dárbbašivččen geasseluomu dál farga...

Naked Number One

Mun guldalan Thomas DiLeva lávlagii Naked Number One. Mii galgat odne dahkat juoidá erenoamáža: Mii galgat hotellii (dat ii leat nu erenoamážit) ja doppe mii galgat lávggodit (ja dat lea spesiála).

Oaidnalit!