Koseriijavahkku

Odne sáddejuvvui mu vuosttaš koseriija. Dat lei ártegis bihttá maid mun báddejin mannan bearjadaga. Odne lean bádden guokte koseriija vel, ja dat sáddejuvvojit ihttin ja gaskavahku.

Otná koseriija namma lei Boaris ja nuorra. Ihtá koseriija namma lea Korespábba, ja gaskavahku koseriija lea Vuodjinkoarta. Mun in leat vuos gávdnan dohkálaš gova alddán maid sáhtášin de sáddet sidjiide, vai iđašii dán siiddus. Muhto mun áiggun dál otná eahkedis dan geahččalit dahkat.

Jus dál hálida guldalit mu koseriija, de sáhtát gullat dan otná Duoldi ádjagis 15:35 maid don gávnnat dán siiddus.

Odne dáidá šaddat sisbandyhárjehallan Báktehárjjis. Ja mii dohko!

Ođasmahttin. Ihttin gullon moadde minuhta badjel gávcci Buorre iđit, Sápmi-sáddagis, jus dus lea dilli guldalit.

Kauto Live 2010 (second night) tonight

Hei, odne lea.
Mun lean gearggus,
Sávan ahte njálbmi nagoda doallat áimmu
Báksamat eai leat dán áiggi šat seamma nannosat
Sopransáksofovnna njálbmebihttá lea unnit go tenora
ja dat mielddisbuktá váttisvuođaid

Mun báddejin ikte vuosttaš koseriija
Jahkečoahkkin lea nohkan; ambassadevra logai munnje:
Don it dárbbaš juhkat vihtta-guhtta vuollaga,
Áidna mii lea dehálaš lea ahte don ipmirdat
ahte don leat bargan buori barggu
Mun lohken: Dat lea váttis
Son diđii dan juo ja čilgii munnje
ahte mii eallit postmoderna áiggis, mis ii leat dilli
Mii joatkit ovddosguvluid.

WINHEC-čoahkkima birra

Dat manná bures. Dat lea visot maid sáhtán lohkat. Dat manná. Lei veaháš eambbo go dat maid ledjen jurddašan. Muhto mis leat ollu olbmot mat barget, de mii gávdnat olles áiggi čovdosiid.

Ledjen Sámeradio Buorre iđit Sápmi-sáddagis otná iđida. Jus hálidat gullat de lean mun vuosttaš guossi Buorre iđit Sápmi-sáddagis tisdag 24 augusti 2010 07:35.

http://sverigesradio.se/cgi-bin/sameradion/program/sandningsarkiv.asp?date=2010-08-24&programid=2515

Fields Of Gold

Lehpet go gullan Sting lávlaga Fields of Gold? Mun lean várra gullan lávlaga ovdal, muhto mun in leat goassige bidjan fuomášumi dasa. Dál galggan dan oahppat čuojahit, go mis lea Egil Keskitalo Bandain dán lávlla repertoaras. Lea gelddolaš. In dieđe dál vuos mot galggašii sáksofovnna čuojahit dása.

Muđui lean barggus juohke beaivvi, maiddái odne (lávvordaga) ja ihttin (sotnabeaivvi). Dat manná bures. Dál lean faktiskt nohkestan, ja de lea áigi fas vuolgit bargui.

Dál lea várra áigi - go vuorddán káffetráktera - muhtun sániid min gussiid birra čállit. Vuosttaš guokte joavkku leaba ikte boahtán. Bussevuoddji vieččai nuppi, ja de vieččai Ándde nuppi stuora Van-biillain. Olbmot Ođđa Sealanddas. Olbmot Australias. Olbmot USA mainlanddas. In dieđe lea go muhtun Hawaiiolbmot maiddái boahtán dál juo. In leat nu olu hupman buohkaiguin. Ihttin ja mánnodaga bohtet vel eambbo olbmot. Muhtun guossit Sámis maid, ja de Canadas, Taiwanas, Somalias.

Mun lean mearridan ahte mun galggan dál bargat nu olu ja nu bures go vejolaš. Goit dán vahku. Lea somá oaidnit olbmuid maiguin lean mailen máŋgii. Dál easka oainnán sin hámi ja stiilla. Dál easka gulan sin jienaid. Addá olu. Mun ipmirdan maiddái buorebut makkár diŋggaiguin mii bargat. Munnje šaddá sihkkarit mihá geahppaseappot bargat WINHEC-ráđđeaddin, go mun dál oahpásnuvan olbmuiguin. Dál manná njuovžileappot...

Kantiidna lea midjiide odne maid, vaikko lea lávvordat, ordnen biepmu. Dat lei njálggat ja vuogas. Ja latnjii bohte šattosat, káffe ja goikebiergu. Mmm..! :)

Ja dá boahtá Ledin, Philipsson ja Strömstedta geassilávlla Sommaren är kort.

Koseriijaarkiiva

Mun gávdnen Ruoŧa Sámeradio koseriijaarkiivva. Čuovo dán liŋkka:

http://sverigesradio.se/cgi-bin/sameradion/program/amnessida.asp?programid=3415&grupp=10095

Guldalin buot Per-Stefan Labba koseriijaide. Ledje hui buorit. Hui somá gullat su, go son hupmá nu čielgasit ja njoazit. Šaddá ollislaš vásihus - giella, ságat, muitalusa mohkit, lohkki jietna.

Koseret Sámi radios :)

I know I should be at work. Even though it is 10:15 p.m. (Viimmat lean oahppan ahte pm lea eahkedis ja am lea ovdalgaskabeaivvi. Lean čohkkán WINHEC-čoahkkima gussiid arrival áiggiiguin... ja go ferte geahččalit koordineret 50 riikkaidgaskasaš guossi, de lea vuogas oahppat...)

Muhto mun lean ruovttus. Ja go viimmat lean ruovttus de lea dieđusge hui olu eará doaimmat maid galggašin doaimmahit. Lean bidjan bivttasbassanmašiinna bassat. Lean lohkan Hálgu deaivilis Dego Yeah-resenšuvnna. Mun livččen dieđusge galgan dál guldalit skerrui, go mun maid plánen dan árvvoštallat áiggi mielde. Muhto mus lea unna soulfeber, ja danin lean bidjan muhtun Stevie Wonder-musihka čuodjat. Lea áibbas buorre. Bassaladdanmašiidna njuike távttas :)

Muhto sivva manin mun dál fuobmájin ahte hálidan čállit iežan bloggas lea dát: Munnje riŋgii Ruoŧa sámeradio ikte. Bivddii mu koseret radios. Olles vahku. Juohke beaivvi, 3-4 minuhta hávális. Vaikko lei sáhka maŋit vahkus - ja dat mearkkaša ahte vuosttaš koseriija ferte leat gárvvis boahtte vahku bearjadaga, sisalohkkon ja visot, ja boahtte vahkku lea dieđusge mu kánske buot hástaleaddjimus vahkku ever - de dadjen dieđusge yes. In sáhte eará. Lean hirbmat duđavaš go ožžon jearaldaga. Munnje orru dego gudnebargu. In sáhttán biehttalit.

Ja mun illudan. Illudan duođas. Fáttat beare cirgot olggos mu njálmmis dehe sisa mu jierbmái. Áiggun hupmat dehálaš ja duođalaš áššiid birra. Šaddá hell of a week. Diekkár fáttat maidda mun liikon: Identiteahtta, boarásnuvvan, niegut, leahkit pro-aktiiva... It will be so good :) Lohpidehket dál munnje guldalit 30. ja 31. beivviid dán mánus, ja de boahtte mánu vuosttaš beivviid! Amma!

Saksofovnnat

Ikte jearai E mus juoidá, go leimmet Hoteallas. Jearai lean go mielde čuojahit Kauto Live:as guovtti vahku geahčen. Dieđusge lean. Mannen ruoktot. Ja odne go lihkken de álgen veahážiid veahážiid ohcat mu saksofovnnaid, páhkket daid bajás. Vuohččan isken sopransaksofovnna, mii oidno govas dás. Gova lea Lotta W Stoor váldán mus mannan geasi, go juste ledjen oastán čuojanasa. Dasto rahpen maid dál eske tenorsaksofovnna maid, maid in leat čuojahan jahkái. Lei dego boahtit ruoktot. Mađi eambbo mu bosun, dađi eambbo dat addá ruovttoluotta. Lean nu giitevaš go mus leat nu erenoamážit buorit instrumeanttat.

Muhto dál ferten jáddadit radio ja čuojahit vel muhtun tovnnaid!

Ođasmáhttin. Muhto dađibahábut ii leat ambrošyra nu go livččii galgan, perfeakta máilmmis. Vuoi, mun váibban go lean beare hui veaháš bosson. Erenoamážit tenora gáibida ollu áimmu...

Because The Night

Mun liikon dán lávlagii maid. Because The Night Belongs To Lovers. Bruce Springsteen. Me gusto :)

MARVIN GAYE & TAMMI TERRELL "Ain't no Mountain High Enough"

Mun liikon dán lávlagii :)

eanet sámegiella neahtas

Go mun álgen dáinna bloggain 2006 de orron Stockholmmas. Mu lagamus olbmát eai lohkan mu blogga. Áiggi mielde lean oahpásnuvvan iežan lohkkiide. Lean maiddái ožžon eanet lohkkiid jagis jahkái. Mun in dovdda beali ge mu lohkkiin, muhto mun dovddan muhtumiid, ja dat váikkuha mu čállima. Muhtumin dovddan ahte diet ja duot ii riekta heive iežan bloggii. Ja dat lea várra buorre. Muhto duollet dállet dovddan maid ahte livččen galgan eambbo čállit, vai teaksta geasuhivččii ain eanet lohkkiid...

Jus galggan juoidá lohkat dán áigodaga birra neahta ja sámegiela dáfus, de fertešin várra lohkat ahte odne olbmot dihtet ahte neahtas gávdnojit sámegielteavsttat. Nu ii lean dalle dolin. Dán áiggi lea nu ollu eanet neahtas go dalle. Neahtta lea duođas šaddan. Muhto mun in dieđe mot manná sámegiel-Wikipediain. Mun in searvva dan čállimis, vaikko livččii veaháš miella. Lihkká in nagot.

suohkadis prográmma 2 vahku vel

Lea Čáhcedrágga leamašan eanus. Mun ođđen. Dehe mun in oađđán juste dalle, muhto mun ledjen ruovttus. Vássán vahkku lea váibadan mu. Mun dál oađán. Dan dárbbašan. Munnje bohtet dál 12 beaivvi maŋŋálaga, ja dáid beivviid in oaččo nu ollu guoros diimmuid. Mánnodaga rájes. Disdaga, gaskavahku, duorastaga, bearjadaga (dalle dat bohtet, na goit muhtumat), lávvordaga (dalle čoahkkin álgá), sotnabeaivvi (čoahkkin joatká), mánnodaga (konstituerenčoahkkin, jus bures muittán), disdaga-gaskavahku-duorastaga (boahtte vahkus: WINHEC:a jahkečoahkkin), bearjadaga vulget ruoktot. Ja de boahtá Kauto Live. Go lean čađat váiban. Go ferten oađđit.

Swedish policeman dancing - polis dansar på stortorget i malmö

Dát ii leat vissa albma poliisa. Muhto orru dego albma poliisa, go dánse muhtun gávppašanšiljus Malmös, he he.

Vanna Rosenberg

Mun in dovdda Vanna, muhto mun muittán su. Son neavttášii muhtun TV-ráidosis, go mun ledjen mánná. Mun oidnen su dalle, ja son balddii mu veaháš. Sus lei muhtun issoras rollá. Son lea otná geasseguossoheaddji Ruoŧa radios. Mun guldalan dál su Sommarii.

I am so fucking tired

Dál álgá vuhttot. Mun lean váiban. Lean guhká bargan dáid beivviid, mánnodaga gitta beal 11 ja disdaga 8 rádjái. Dál hálidivččen mannat ruoktot. Ja diibmu ovccis ihtin iđđes árrat, de lea mis čoahkkin, ja dan čoahkkima áššebáhpirat eai leat vuos biddjon. Ja dat lea mu bargu. Ja mun dovddan ahte: Dál mun lean váiban. Mun in nagot eará go mannat ruoktot. Muhto mun fertešin measta. Fertešin measta nagodit. Mun han lean nuorra. Dát ii dáidde nu váttis. Ii sáhte nu váttis. Uffá, muhto mokta han manná. Ja go ii leat mokta šat, de. Mii dalle?

Ođđa dilit

Mun oidnen odne mu boahtteáiggi. Mun dáiddán deike báhcit. Guovdageainnu servodahkii. Mun šattašin áiggi mielde guovdageainnolaš. Mun oidnen dan odne. Jus dáppe oččošin bistevaš barggu. Oččošin fámu. Veaháš fámu. Juogalágan fápmu han lea, bistevaš virgi. Jus oččošin. Ii oktage sáhtášii mu šluvgit olggos. Na, dat livččii goit mihá váttis.

Mun in bala fámus. Muhto. Mun veaháš álggán ballat juogamas, dál go mu dilli rievdá. Jus mun moadde jagi áigi ledjen friija olmmoš gii dajašii maid ieš hálidin - kánske juste go ii lean nu olu fápmu, kánske juste go olbmot eai beroštan nu sákka mu ságain - de lean dál veaháš eará. Mun nuppástuvan. Lean aitto čállán giehtačállosa: diktagirjji man namma lea Dagar i Kautokeino. Dat ii leat kritihkalaš, ii sáhte dan gohčodit nu hirbmat kritihkalažžan, muhto das leat kritihkalaš čuiggodusat. Jagi áigi livččen áinnas dan čájehan buohkaide (jus dalle livččii válmmas). Dál go fargga lea deaddiluvvon, de in dieđe. Lean odne jurddašišgoahtán, dál jur eske, ahte dat várra ii váikkut mu karriera nu go galggašii, dat várra ii váikkut rievttes guvlui. Dat kánske baicce lea heittot munnje. Ja buot diet ballu, maid mun oidnen Sámis ovdal, vuhtto dál mu iežan siste.

Dál filosoferen. Sihkkarit sádden girjji prentehussii. Sihkkarit joatkkán iežan ságaiguin. Eai dát áššit várra bisset mu. (Ii oktage leat ge meidnen bissehit mu, dat lea beare mu siste dat ballu šaddá.) Muhto mun ferten muitalit ahte mun oainnán iežan nuppástuvvama. Dat ii leat álohii nu somá.

Ellet dearvan!

Odne lei nu čáppa dálki
Mun bargen olles beaivvi
Dál lea áigi nohkkat
Eallin lea čáppat, dat maid :)

Ruošša jámii sávnnjis

Vuoi, dát ledje issoras ođđasat. Suomas leat leamašan sávdnjemáilbmemeašttirgilvvut. Lei 110 lieggasgráđa Celsius sávnnjis.

Mun oidnen dán čuohpanasa Expressen-TV:as:

http://tv.expressen.se/nyheter/Utrikes/1.2089388/rysk-man-dog-under-bastu-vm

Sommar Annika Östbergain

Annika Östberg. Su Geasseprográmma lea astonishing. I like it.

vajálduhttit ja muitit

Logan Hélène Cixous girjji Gull - brev frå far min (Gyldendal 2008). Son muitala ahte mii vajálduhttit nu olu, ja ahte dat lea buorre. Dan dihte mii sáhttit ge lohkat seamma girjji máŋgii.

Lea mu mielas hui miellagiddevaš jurdda. Ahte lea buorre ahte mis lea nu heajos muitu. Hálidin dušše dan muitalit.

Sprängaren (filbma)

Gulan Max Mackhé lávlludettiin Sámeradios
Lea hui buorre
Odne lea čuovžafestivála Stuorajávrris
muhto mun in dieđe gos Stuorajávri lea
In ge beroš nu olu
Lean filmma luoikan girjerádjosis
Sprängaren, dat lei áibbas buorre
Helena Bergström lea buorre váldopersovdnan
Mun in láven liikot sutnje, muhto dán filmmas gal dohkkii
Lei velá buorre maid, čeahppi
Liikojin oaidnit dan
Colin Nutley lea vissa bidjan návccaid rievttes olbmui...

Beaivegirji-Blog-Facebook-Twitter

Mun ikte jerren alddán: Manne mun galggašin dán áiggi šat čállit beaivegirjji? Mun han sáhtán seamma bures čállit bloggi maid jurddašan. Dehe Facebookai. Dehe Twitterii. Vai sáhtán go duođas dahkat dan? Ii go leat makkárge earru šat? Lea go duođas almmolaš latnja šaddan nu stuoris ahte mun čágašin dasa buot mu jurdagiiguin? Dohkkejit go dán áiggi buot áššit almmolaš latnjii?

Almmolaš latnja lea nuppástuvvan, dat lea sihkar. Ja dán áiggi lea lohpi vaikko muitalit iežas siskkaldas jurdagiid neahtas. Muhto, loahpa loahpas, mun čálán ain mu beaivegirjjis muhtun áššiid. Kánske erenoamážit diekkár áššiid mat eai riekta heive almmolaš lanjas. Ja maid de barggan dainna beaivegirjjiin? Juo, mun almmuhan dan girjin :D

Dat lea duohta. Mun almmuhan farga mu iežan beaivegirjji, dehe muhtun unna oasážiid iežan beaivegirjjis, girjin.

Guldalan Nils Landgrena geasseprográmmii. Lea buorre, son čuojaha Jimi Henrixa Are You Experienced?

Odne lean hupman. Ja mun lean ožžon miela bargat allaskuvlla dutkanráđđeaddin. Sávan ahte mun oaččun dan barggu, maid lean ohcan. Livččii veaháš somá. Lean odne inspirerašuvvan :)

WINHEC:a birra Ávviris :)

Fina Ávvira siiddus ja loga munno Jan Henryin ságaid :)

I Fall in Love too Easily

Is it ridiculous to fall in love? Mun jearan, go ieš hálidivččen diehtit manne mun in ráhkásnuva dán áiggi šat seamma dávjá go ovdal. Mun várra in luoitte dan riekta ovdan, dan ráhkisvuođa. Mun muittán lávlaga, maid gullen Uppsalas oktii 90-logu loahpas. Ledje muhtun iránalaččat main lei pizzeria, ja dan pizzeriijas lei juohke lávvardaga jam-session. Lávejin doppe čuojahit iežan boares King-saksofovnna. Dávjá ledje maiddái hui čeahpes olbmot doppe čuojaheažžat. Muittán Roland Keijser go presenterii lávlaga maid áiggui čuojahit. Dajai: "Dát maid mii áigut čuojahit dál, dat lea okta dain guovtti golmma lávlagis dán máilmmis main lea nu hirbmat buorre namma ahte ii gánnát nu ollu lasihit. Ieš namma muitala visot. Mun dovddan oalle dávjá juste seamma dovdduid maid lávllačálli ieš lea dovdan go son čálii dan. I fall in love too easily."



Dat lea eambbo go logi jagi áigi. Mun muittán dan ain hui bures, ja láven duollet dállet dan birra smiehtastallat. Muhtumin lean jearran alddán ráhkásnuvan go mun nu álkit, vai in? In leat riekta ožžon dan cealkaga ja dán lávlaga sadjái. Muhtumin lean románttalaš čalmmiiguin jurddašan ahte juo, mun lean maid diekkár gii ráhkásnuvvá. Ja de fas, nu go dál, leat leamaš áigodagat, main diet cealkka lea hui amas leamašan. Mun in šat ráhkásnuva albmaládje. Lea veaháš suddu. Go hálidivččen dieđusge. Vai hálidivččen go? Maid, jus mun baicce meidnen ahte ráhkisvuohta lea beare ridiculous munnje? Ihtet nu olu jearaldagat. Manne mun in šat duostta luohttit dasa? Manne mun in hálit seaguhit iežan daidda diŋggaide?

Duohtavuohta lea ahte mus ii leat vástádus. Mu iešgovva lohká ahte mun lean duostil. Muhto dan gova fertešin várra hástálit dáid áiggiid. Dat ii oro šat doallame deaivása...

Judas Priest - Breaking The Law

Ruoŧa radios lea garrarock-prográmma man namma lea Dist. Odne go guldalin ožžon tipssa. Logai ahte Judas Priest álggahii garrarocka albumiin British Steel 1980. Dan ovdal lei leamaš juogalágan čáffa bluesa, muhto dat ii lean rievtti mielde garrarocka. Mun in dieđe maid galgá dasa lasihit. Muhto, nu go prográmmajođiheaddji logai: Lea somá oaidnit Breaking The Law, go dat lea muhtun jagi ovdal MTV álggii sáddet musihkkavideuid TV:as. Dainna oaivvilda ahte dát video ii leat seamma proffa dán áiggi videuid ektui. Ja dat lea várra veaháš duohta. Muhto somá lea goit ge dan oaidnit.



You don't have to be old to be wise lea eará lávlla mii lea čáffa.



Ja vel okta miellagiddevaš diehtu bođii ovdan prográmmas maid guldalin. Rob Halford, Judas Priesta lávlu, lea ivdnen heavy metalmota hui sákka.

Máŋggas hupmet várra heavy rokkeriid biktasiid birra, oaivvildettiin ahte dat leat nu feminiinnat. Ja mun sáhtán áinnas mieđihit ahte garrarockartisttat, ja erenoamážit lávlut kánske, leat muhtumin hui čábbát ja sexyt. Mun in riekta diehtán duogáža dasa. Muhto dál gullen ahte lei Rob Halford, Judas Priesta lávlu, gii lea bidjan stiilla garrarockeriidda. Gullen maiddái ahte son duođas liikui leahkit Londona hbt-distrivttas, ja ahte son lea inspirerejuvvon dain biktasiin. Halford bođii olggos homofiilan 1999. Lea mu mielas miellagiddevaš liigediehtu. Ja ovtta vuohkái ipmirdan buorebut manne lea šaddan nu go lea šaddan. Muhto mun in dieđe dihtet go buot garrarockerat ahte gárvodanstiila vuolgá Londona hbt-distrivttain. In ge dieđe lea go nu dehálaš dan diehtit. Muđui lean gullan (eará sajis) ahte piercing vuolgá sadomasochismas. Ja geat dihtet dan? Muhto: Lea go dehálaš diehtit gos diŋggat vulget? Maid don oaivvildat ;)