Muhtun áššit. Lea mánnodat.

Odne lea mus ollu ságat. Vuosttaš lea ahte aviissas čuožžu ahte Magne Hovdena romána Sameland lea dan mađi buorre ahte galgá jorgaluvvot máŋgga gillii (Braksuksess for bokdebutant). Mun de viegan girjerádjosii, gos oaččun veahki gávdnat girjji. Dál lea mus girji dás iežan luhtte, ja lean álggán veaháš lohkat, muhto dat ii oro buorre :(

Nubbi ášši lea ahte mun fitnen bátnedivššára luhtte. Lei nu buorre. Go olmmoš ii leat muhtun áiggis eará olbmuiguin lagas leamašan, de lei nu buorre ahte muhtun olmmoš divššui mu njálmmi veaháš. Cokkai iežas litna suorpmaid ja válddii eret bátnegeđggiid, lihkahii mu báksamiid. Mun muitalin dasa ahte lei nu buorre leahkit bátnedivššára luhtte, ahte lei hui buorre dovdu. Dat vástidii ahte gávdnojit earát mat eai leat seammaoaivilis muinna dien áššis :)

Goalmmát ášši lea ahte mii humaimet ođđaáigásaš dábiid birra boradanbeavddis lunšedettiin. Olmmái logai ahte mun in livčče birgen Facebooka ja blogga haga. Mun in leat ovdal nu jurddašan muhto dat lea várra veahá duohta. Livččen gal ohcalan ruoktot ain eambbo, erenoamážit jus ii livčče Facebook. Livččen riŋgen eambbo. Ja jurddaš jus ii livčče delefovdna ;)

Njealját ášši lea ahte aiddo vuššen maniid juste muttágit. Ledje nu njálgát :)