Bernt Mikkela "Lapsang"

Odne áiggun viehkat. Ferten beare vuordit veaháš, vai biebmu sajáiduvvá čoavjji sisa. Go čoavji dál bargá dainna, de sáhttet mu gieđat ja mu oaivi blogget. Viehkan de boahtá julggiide ja muđui ge rupmašii. Meidnen váldit ránnja beatnaga mielde, jus dat mieđiha (ja dál human beatnaga birra, dan váhnemat leat juo mieđihan, ovdal go vulge lupmui, dál mun lean dat beanafákta).

Buvrru borren eske.

Mun guldalan Bernt Mikkel Haglunda Lapsang-skerrui. Addá áibbas buriid dovdduid munnje. Son lea čeahppi mu mielas, sihke musihka dáfus ja juoigan dáfus. Skearru addá diekkár ollislaš-dovddu. Son lea jurddašan olles áiggi. Váibmoprošeakta sutnje, dieđusge. Lea buorre skearru. In láve nu dávja guldalit, muhto go dagan dan de dagan dan, ja dalle láven liikot dasa. Vuohtán maid muhtun duostilis sárgastagaid das - earret eará ahte juoigá iežas luođi. Addá dieđusge liigedimenšuvnnaid, go buvttadeaddji lea duostil.

Oidnen maiddái su Facebookprofiillas ahte son lei ieš bidjan su ođđa CD, dehe rievtti mielde Riebana ođđa CD, Sámi Grand Prix 2010 profiilagovvan. Mun maid osten skearru Remas mannan vahku. Lea dohkálaš ja várra velá eambbo maid. Ollu somás lávlagat, ja čáppa luođit maid. (Maid mun, manne nu positiivvalaš jur odne?) Jurddašin ahte mun galggalin maid bidjat iežan buktaga, Språkspelet, iežan profiilagovvan. Muhto in jur odne, várra. Na sáhtášin gal dieđusge iskat lea go doppe dihtoris muhtun vuogas govva.